വാസുവിന്‍റെ വിലാപങ്ങള്‍

ബസ്സ് മീറ്റ് - തൃശൂര്‍

2011-09-04T19:18:00.000+05:30

ആമുഖം
ഹബി മുഖ്യസംഘാടകനായി സ്വയം അവരോധിച്ച് രണ്ടായിരത്തി പതിനൊന്ന് സെപ്തംബര്‍മാസം മൂന്നാം തീയതി തൃശൂരില്‍ ഒരു ബസ്സ് ഓണേഴ്സ് മീറ്റ് നടത്താന്‍ തീരുമാനിക്കുന്നു. വന്‍ പിച്ച ആസൂത്രണങ്ങള്‍ അദ്ദേഹത്തിന്‍റെ ബസ്സില്‍ നടക്കുന്നു. പ്രസ്തുത പരിപാടിയുടെ വിജയത്തിനായി ഇരവുകള്‍ പകലുകളാക്കി മത്താപ്പ് കാര്യങ്ങളെ മുന്നോട്ട് നയിക്കുന്നു. നൂറോളം ബസ്സ് ഓണേഴ്സിന് ഉണ്ടുറങ്ങാന്‍ തൃശൂര്‍ നഗരപ്രാന്ത പ്രദേശങ്ങളിലെ സി ക്ലാസ്സ് ലോഡ്ജുകള്‍ ബുക്ക് ചെയ്യാനായി അവസാനം തീരുമാനമായി. ഉച്ചഭക്ഷണത്തിനായി എണ്ണൂറ് സീറ്റ് കപ്പാസിറ്റിയുള്ള തിരുവമ്പാടി ദേവസ്വം വക സദ്യാലയം ബുക്ക് ചെയ്തു. യാത്രാ സൗകര്യങ്ങള്ക്കാതയി കെസേര്‍ട്ടീസി വക രണ്ട് ലോ ഫ്ലോര്‍ ബസ്സുകള്‍ എറണാകുളത്തുനിന്നും തൃശൂരേക്ക് ഇറക്കുമതി ചെയ്യാന്‍ ഹൈക്കമാന്‍റ് വഴി ചില്ലറ ശ്രമങ്ങള്‍ നടത്തുന്നു.

സെപ്തംബര്‍ മൂന്ന്-തൃശൂര്‍
കൃത്യം പത്തുമണിക്ക് മീറ്റ് തുടങ്ങുമെന്നാണ് അറിയിച്ചിരുന്നത്. അതുകൊണ്ട് തന്നെ ഞാനൊരു അഞ്ചരയ്ക്ക് അലാറം വെച്ചഴുന്നേല്‍ല്‍ക്കുകയും മൂത്രമൊഴിച്ച് വീണ്ടും കിടന്നുറങ്ങുകയും ചെയ്തു.

സമയം: പത്ത് പത്ത്
തൃശൂര്‍ മെഡിക്കല്‍ കോളജ് പരിസരത്തുനിന്ന്, ഒരു വലിയ ബാഗ് നിറയെ അരിയുണ്ട അവലോസുണ്ട ഉണ്ടന്‍പൊരി തുടങ്ങിയ ആഹാരസാധനങ്ങളുമായി തിരക്കുള്ള ബസ്സ് നോക്കി ഞാന്‍ കയറി. ഇടയ്ക്ക് ഹബിയെ വിളിച്ച് തൃശൂരെ ഒരുക്കങ്ങളെക്കുറിച്ച് അന്വേഷിച്ചു. ഫിലാഡല്‍ഫിയയിലെ ഏതോ ജംഗ്ഷനില്‍ ട്രാഫിക്കില്‍ കുരുങ്ങി നില്ക്കുകയാണെന്ന മറുപടി എന്നെ അലോസരപ്പെടുത്തി. സബ് സങ്ങാടനായ മത്താപ്പ് എല്ലാകാര്യങ്ങളും ചെയ്തിട്ടുണ്ടാകുമെന്ന ഹബിയുടെ വാക്കുകള്‍ എന്നെ തെല്ലൊന്നാശ്വസിപ്പിച്ചു.

സമയം: പത്ത് ഇരുപത്
ഞാന്‍ സിയെമ്മസ് സ്കൂള്‍ പരിസരത്തെത്തി. തൊട്ടകലെയായി അതാ നമ്മുടെ പ്രിയപ്പെട്ട കുറേ ബസ്സേഴ്സിനെ പൊലിസ് വാനിലേക്ക് കയറ്റുന്നു.... ഇല്ല.. എനിക്ക് തെറ്റിയതാണ്.. യാചകനിരോധനമേഖലയില്‍ നിന്നും പിച്ചക്കാരെ പോലീസ് നീക്കം ചെയ്യുന്ന കാഴ്ചയായിരുന്നുവത്. മനസ്സില്‍ തികട്ടി വന്ന സന്തോഷം വേദനയോടെ കടിച്ചമര്‍ത്തി .

സമയം: പത്തേമുക്കാല്‍
മത്താപ്പിനെ വീണ്ടും വിളിച്ചു. സെറിലാക്ക് കുടിച്ച ശേഷം ഞാനിതാ ഇറങ്ങുന്നുവെന്നറിയിപ്പ് കിട്ടി. അടുത്തകണ്ട പെട്ടിക്കടയില്‍‍ നിന്നും ഒരു കവര്‍ അരസന്‍ ബീഡി വേടിച്ച് വെറുതെ പുകവളയങ്ങളുണ്ടാക്കി രസിച്ചുകൊണ്ടു നിന്നു.

സമയം:പതിനൊന്നേ പത്ത്..
ഒരു സ്കൂള്‍ കുട്ടി പുറത്ത് വന്ന് തോണ്ടി. അതേ അവനാണ് ഞങ്ങ പറഞ്ഞ മത്താപ്പ്.. അവനാണ് മത്താപ്പ്.

കാറ്റടിച്ച് പറന്നുപോകാതിരിക്കാനാണെന്ന് തോന്നുന്നു തോളില്‍ ഒരു നാല്പത് കിലോയുടെ ബാഗ് തൂക്കിയിട്ടുണ്ട്. പെട്ടെന്ന് മത്തായിയുടെ ഫോണ്‍ കോള്‍. തൃശൂരെത്തിയിട്ടുണ്ട് ഉടനെ കണ്ടുമുട്ടാമെന്നറിയിച്ചു. അരമണിക്കൂര്‍ കഴിഞ്ഞുകാണണം വീണ്ടും...മത്തായിയുടെ ഫോണ്‍ ഇവിടെ പാറമേക്കാവ് നാലെണ്ണം ഉണ്ടോ? ഞാന്‍ ഞെട്ടി! എന്‍റെ ഞെട്ടലുകണ്ട മത്താപ്പിനും ചെറ്യ ഡവുട്ട്. ഓണക്കാലത്ത്, തൃശൂര്‍ റൗണ്ടിലൂടെ ബസ്സില്‍ പോകുമ്പോ ചിലപ്പോ എട്ടുപാറമേക്കാവ് വരെ കാണാറുണ്ടന്നവന്‍ സാക്ഷ്യപ്പെടുത്തി. അധികം വൈകിയില്ല പന്ത്രണ്ട് മണിയോടെ അഞ്ചാമത്തെ പാറമേക്കാവും കണ്ടതിനുശേഷം ഒരു കാര്‍ ഞങ്ങളുടെ മുന്നില്‍ ഒരു മുരളലോടെ ഇടിച്ചു നിന്നു.
നിവിനായിരുന്നു സാരഥി. പതിനഞ്ചുവയസ്സുള്ളവര്ക്ക് ഡ്രൈവിങ് ലൈസന്സുകൊടുക്കില്ല എന്നുപറഞ്ഞേന് ഒരു ട്രാഫിക്ക് പോലീസുകാരനോട് തട്ടിക്കയറിയതിന്റെറ പരിണിതഫലം അവന്‍ കവിളില്‍ തലോടി മാറ്റിക്കൊണ്ടിരുന്നു. മത്താപ്പിനെ മത്തായിയുടെ മടിയിലേക്ക് ക്രാഷ് ലാന്‍റ് ചെയ്യിച്ച് കാറിന്റെ പിറകിലെ സീറ്റിലേക്ക് നോക്കി. ഐറിസ് മോനെന്താ അമ്മുമ്മയും കൊണ്ടാണോ മീറ്റിന് വരുന്നേന്ന് ഞാന്‍ ചോദിച്ചു. മത്തായിയാണ് പറഞ്ഞത് അത് അതുല്യാമ്മയാണെന്ന്.

സമയം: പന്ത്രണ്ട് അഞ്ച്
വണ്ടി സ്റ്റാര്‍ട്ടാക്കി.. ഇല്ല സ്റ്റാര്‍ട്ടാവുന്നില്ല.. എല്ലാരും പുറത്തിറങ്ങി കൈവയ്ക്കാന്‍ നിവിന്‍റെ ആഹ്വാനം. ട്രാഫിക്ക് പോലീസുകാരന്റെ് കയ്യീന്ന് അവന് കിട്ടിയില്ലാരുന്നെങ്കില്‍ എല്ലാരുംകൂടി അവനെ കയ്യ് വെച്ചേനേ. ഒടുവില്‍ ആ മയില്‍ വാഹനം ശക്തന്‍ പാലസിനുമുന്നിലുള്ള റോഡിലെത്തി. മത്താപ്പിന് വളരെ പരിചിതമായ വഴിയായതുകൊണ്ട് മൂന്ന് പ്രാവശ്യമേ പാലസിലെത്താനുള്ള വഴിയില്‍ കന്‍ഫ്യൂഷന്‍ വന്നുള്ളു.

സമയം: പന്ത്രണ്ട് ഇരുപത്
അവസാനം പാലസിന്‍റെ ഗേറ്റ് തള്ളിത്തുറന്ന് അകത്തേക്ക്... ഒരു പ്ലാസ്റ്റിക് ബാഗില്‍ അരിയുണ്ടയുമായി അകത്തുകടന്ന മത്തായിയെ സെക്യൂരിറ്റി ദേഹപരിശോധന നടത്തണമെന്ന് പറഞ്ഞ് റൂമിനകത്തേക്ക് കൂട്ടിക്കൊണ്ടുപോയി. കുറച്ച് നേരമായിട്ടും കാണാതായപ്പോള്‍ ഞങ്ങള്‍‍ക്ക് ടെന്‍ഷനായി. എല്ലാവരും അവിടേക്ക് പാഞ്ഞെത്തി സെക്യൂരിറ്റി റൂം തല്ലിത്തകര്‍ത്തു. അപ്പോള്‍ ഞങ്ങളങ്ങനെ ചെയ്തില്ലായിരുന്നെങ്കില്‍ ചാരിതാര്‍ത്ഥ്യം സെക്യൂരിറ്റി കെളവന്‍ കവര്‍ന്നേനേ എന്ന് മത്തായി വികാരാധീനനായി പറഞ്ഞു.

സമയം:പന്ത്രണ്ട് ഇരുപത്തഞ്ച്
അമിട്ട് സീ.ഈ.ഓ രാകേഷും വിക്കിപ്പീഡിയനായ മനോജും സ്ഥലത്തെത്തി.

ശക്തന്‍ തമ്പുരാന്‍‍ സെറ്റപ്പുകളേങ്കൊണ്ട് ആര്‍മാദിച്ചിരുന്ന കുളത്തിന്‍റെ കരയിലിരുന്നു അല്‍പം വെടിവട്ടം.

നെയ്റോസ്റ്റ് തിന്നാല്‍ ഉടനേ വിശക്കുമെന്ന് ഐറിസ്.. അതല്ല മസാലദോശതിന്നാലാണ് വിശപ്പുണ്ടാകുന്നതെന്ന് രാകേഷ്. എന്തിനേറെപ്പറയുന്നു.. അതുല്യാമ്മ കൊണ്ട് വന്ന അരിയുണ്ട നിമിഷങ്ങള്ക്കുള്ളില്‍ അപ്രത്യക്ഷമായി. മനോജ് വീട്ടില്‍ നിന്നും കൊണ്ടുവന്ന ഉട്ടോപ്യന്‍ ചക്കരയുണ്ടയുടെകാര്യവും മറിച്ചായിരുന്നില്ല.

ഹബികൊണ്ടുവരുന്ന രാമശ്ശേരി ഇഡ്ഡലിയുടെ കാര്യവും ഇലയടയുടെ കാര്യവും ആലോചിച്ച് ബസ്സോണെഴ്സ് കുളത്തില്‍ കല്ലുകള്‍ വാരിയെറിഞ്ഞ് ആനന്ദിച്ചു. ഉദ്യാനത്തിലെ ഉലാത്തിനുശേഷം കൊട്ടാരത്തിന്‍റെ ഉമ്മറേത്തേക്ക് ചെന്നപ്പോള്‍ ഉണ്ടപക്രുവിന് വെട്ടൂര്പുരുഷനിലുണ്ടായൊരുത്തന്‍ തോളില്‍ ഒരു ചാക്കുകെട്ടുമായി നില്ക്കുന്നു. ശങ്കരന്‍..ശങ്കര്‍ദാസ്...

സമയം:പന്ത്രണ്ട് അമ്പത്..
ഹബിയും അനിമേഷും അള്‍ട്രാസ്ലോമോഷനില്‍ വെറുംകയ്യോടെ ഞങ്ങളുടെ അടുത്തേക്ക്..
"കള്ളന്‍ ഹബി! രാമശ്ശേരി ഇഡലി കാറില്‍‍ വച്ചിട്ടായിരിക്കും അവന്‍ വരുന്നത്.." ബസ്സര്‍മാര്‍ അടക്കം പറഞ്ഞു. ഞങ്ങളുടെ പ്രതീക്ഷകള്‍ അസ്ഥാനത്തിയിരുന്നുവെന്ന് പ്രത്യേകം പറയണ്ടാല്ലോ. അവന്‍ ചതിച്ചു. അല്ലേലും ബസ്സോണേഴ്സിനെ വിശ്വസിക്കരുതെന്ന് എന്‍റെ ആശാനെന്നോട് പറഞ്ഞിട്ടുണ്ടായിരുന്നു കൂട്ടുകാരേ..

‌സമയം: പന്ത്രണ്ട് അമ്പത്തഞ്ച്
മദ്ധ്യവയസ്കയായ ഒരു കൗമാരപ്രായക്കാരി അവിടെയത്തുന്നു. കിച്ചുത്താത്തയെന്നാണ് പേര്.
തുടര്‍ന്ന് ഫോട്ടോസെഷന്‍. തിരിഞ്ഞും മറിഞ്ഞും കിടന്നുമൊക്കെ പലപോസുകളില്‍ ബസ്സോണേഴ്സ് ഫോട്ടോയെടുത്ത് ആനന്ദിച്ചു. ഒരു ഗ്രൂപ്പ് ഫോട്ടോയ്ക്ക് പോസ് ചെയ്യുമ്പോ ക്ലാസ്സ്മേറ്റ്സില്‍ പെന്ഗ്വി ന്‍ വരുന്നതിനെ അനുസ്മരിപ്പിച്ചുകൊണ്ട് ഫെമി ഞങ്ങളോടൊപ്പം ജോയിന്‍ ചെയ്യുന്നു. വീണ്ടും ഒന്നു രണ്ട് ഫോട്ടോകൂടി.

കുപ്രസിദ്ധ ബ്ലോഗേഴ്സും ബസ്സേഴ്സുമായ വിയ്യെം, മുള്ളുര്‍, പട്ടെട് തുടങ്ങിയവര്‍ എത്തുമെന്ന് കരുതി ശക്തന്‍ തമ്പുരാന്‍റെ കുടുംബവീടിന്‍റേം തേക്കിന്‍കാട് മൈദമാവിന്‍റേം മുന്നില്‍ സ്ഥാപിച്ച ഫ്ലക്സ് ബോര്‍ഡുകളില്‍ ബലിക്കാക്കകളുടെ കാഷ്ടം പതിഞ്ഞപ്പോഴേക്കും ആരാധകര്‍ നിരാശരായി. അതിന്‍റെ തുടര്‍ചലനമെന്ന നിലയില്‍ ബിനി ബാറിന്‍റെ ടേബിളുകളില്‍ നിന്നും ബിയര്‍ കുപ്പികളും സോഡാക്കുപ്പികളും ഒഴിഞ്ഞ ഗ്ലാസ്സുകളും വെയിറ്റര്മാര്‍ പെട്ടിഓട്രഷ വിളിച്ച് പുറത്തേക്കു കൊണ്ടുപോകുന്ന കാഴ്ച, ഓണത്തിന് തുണികള്‍ വാങ്ങാനെത്തിയവരുടെ കണ്ണുകള്‍ പോലും ഈറനാക്കി.

സമയം: ഒന്ന് മുപ്പത്
വിശപ്പുസഹിക്കാന്‍ വയ്യാതെ പുല്ലുപറിച്ച് തിന്നുന്ന മത്തായിയുടെ പിന്നാലെ ഐറിസ്മോനും പോയി. ഒടുവില്‍ ടാമരന്‍റില്‍ ചെന്ന് വല്ലതും കഴിക്കാമെന്ന് ഒരു അശരീരികേട്ട് ബസ്സോണേഴ്സ് ആനന്ദ നൃത്തമാടി. അതിന്‍റെ ഫലമായി ഒരു ചാറ്റല്‍ മഴയുണ്ടായതായി ദൃക്സാക്ഷികള്‍ പറയുന്നു. പങ്കെടുത്ത പതിമൂന്ന് പേര് മൂന്നുകാറുകളിലായി ടാമരിന്‍റ് ഹോട്ടലിലേക്ക്. പാരഗണ്‍ ബാറിന് തൊട്ടടുത്താണീ ഹോട്ടലെന്നത് എന്‍റെ സിരകളില്‍ കുളിര് കോരിവാരിനിറച്ചു. ബാറിനുമുന്നില്‍ പതുങ്ങി നിന്ന എന്നെ എല്ലാവരും കൂടി പൊക്കിയെടുത്ത് റസ്റ്ററന്‍റിലെ ഒരു കസേരയില്‍ ബലമായി ഉപവിഷ്ടനാക്കി. പേനകംകുറുക്കനും മിഥുനും അധികം വൈകാതെ റസ്റ്ററന്‍റില്‍ എത്തി. പിന്നെയായിരുന്നു ശരിയായ അങ്കം. കോഴിക്കാലുകള്‍കൊണ്ട് ഡൈനിങ് ടേബിളില്‍ അത്തപ്പൂക്കളമിട്ടു. ഇതിനിടയ്ക്ക് സ്വപ്നന്‍ എവിടെന്നോ പ്രത്യക്ഷപ്പെട്ടു. പൊട്ടിച്ചിരികളും കളിയാക്കലുകള്‍ക്കിമിടയ്ക്ക് ഫ്ലാഷുകള്‍ മിന്നി. ബില്ലുമായി വെയ്റ്റര്‍ വരുന്നതുകൊണ്ടാകണം പലരും ടോയ്‍ലറ്റുകളിലേക്ക് പോകുന്നു. എന്താണന്നറിയില്ല പെട്ടെന്ന് എനിക്കുമൊരു മൂത്രശങ്കയുണ്ടായി. ഏതെങ്കിലും എന്നാറൈ ബില്ലു മൊത്തോം പേ ചെയ്യുമെന്നാണ് കരുതിയത്. പ്രതീക്ഷകള്‍ക്കു വിരുദ്ധമായി ഹബി കാശ് പിരിക്കാനാരംഭിച്ചു. എന്‍റെ പോക്കറ്റില്‍ അവശേഷിച്ചിരുന്ന ഇരുപത്തഞ്ചുപൈസാ നാണയംവരെ അവന്‍ പിടിച്ചു വാങ്ങി.

സമയം: രണ്ടര
ഹോട്ടലില്‍ നിന്നിറങ്ങി തേക്കിന്‍കാട് മൈതാനത്തിലേക്ക് വലിഞ്ഞ് കയറി. അവിടെയും ഫ്ലാഷുകള്‍ കുറേ മിന്നി.

ഒടുവില്‍ മൂന്നുമണിയോട് കൂടി ഞാനും സ്വപ്നനും അനിമേഷും ഒഴികയുള്ളവര്‍ ശക്തന്‍ പാലസിലേക്ക് വീണ്ടും തിരിച്ചു. (ശക്തന്‍ പാലസില്‍ പിന്നെയെന്തൊക്കെ അത്യാഹിതങ്ങളാണ് സംഭവിച്ചെന്ന് അറിയില്ല)

‍സമയം: മൂന്ന് പത്ത്
അനിമേഷ് ഓഫീസിലേക്കും ഞാനും സ്വപ്നനും റയില്‍വേ സ്റ്റേഷനിലേക്കും യാത്രയായി. ക്യൂ നില്ക്കാതെ കൗണ്ടറില്‍ ഇടിച്ച് കേറിയ സ്വപ്നനെ ചിലര് കയ്യേറ്റം ചെയ്യാന്‍ ശ്രമിച്ചു. ഇതുകണ്ട ഞാന്‍ സ്വപ്നനെ ബാറില്‍ വച്ച് കണ്ട പരിചയം പോലും കാണിക്കാതെ മാറി നിന്നു(നല്ല അടി നാട്ടിക്കിട്ടും. എന്തിനാ അന്യനാട്ടീന്ന്..) ഒടുവില്‍ ആരുടെയോ കയ്യുങ്കാലും പിടിച്ച് സ്വപ്നന്‍ ടിക്കറ്റുമായി വിയര്‍ത്തു കുളിച്ച് ട്രെയിനിലേക്ക് കയറി. ഞാന്‍ കൈവീശിക്കാണിച്ചു. അപ്പോള്‍ അവന്‍റെ മുഖത്തെന്തായിരുന്നു ഭാവം? ഇതൊക്കെയാര്‍ക്ക് ശ്രദ്ധിക്കാന്‍ സമയം. ടൈറ്റ് സ്ലീവ്‌ലെസ് ടിഷര്‍ട്ടും ജീന്‍സുമിട്ട ഒരു കുട്ടിയിലേക്ക് എന്റെ‍ റെറ്റിന ഫോക്കസ് ചെയ്തു.

സമയം: മൂന്ന് അമ്പത്
ജനശതാബ്ദി കറക്ട് സമയത്തെത്തി. വെയിറ്റിങ് ലിസ്റ്റിലായിരുന്ന ഇ-ടിക്കറ്റുമായി ഞാന്‍ അകത്തേക്ക്. സീറ്റ് കിട്ടുമോയെന്ന് അറിയാന്‍ ടിക്കറ്റുമായി ടിടിയാറിനെ സമീപിച്ചു. അപ്പോഴാണ് ആ ഞെട്ടിക്കുന്ന വാര്‍ത്ത ഞാനറിയുന്നത്. കന്‍ഫേമല്ലാത്ത ഇ-ടിക്കറ്റിന് മത്തായിയുടെ വിലപോലും കിട്ടില്ലെന്ന്. ദാറ്റീസാന്‍ ഇന്‍വാലിഡ് ടിക്കറ്റ്!!!!! ചങ്കുതകര്ന്നു . ടിക്കറ്റില്ലാതെ യാത്ര ചെയ്യുന്നതിന് മുന്നൂറ്റിനാല്പ്തുരൂപാ ഫൈന്‍! ചുറ്റുംനിന്ന നിന്ന പെണ്‍കുട്ടികള്‍ എന്നെത്തന്നെ നോക്കി ഊറിച്ചിരിക്കുന്നതായി ഏറുകണ്ണിട്ടു നോക്കിയപ്പോ മനസ്സിലായി. ഫൈനുമടച്ച് ഇരിക്കാന്‍ സീറ്റുമില്ലാതെ മൂന്നുമണിക്കൂര്‍ ട്രെയിനില്‍ അങ്ങോട്ടുമിങ്ങോട്ടും ഗതികിട്ടാപ്രേതങ്കണക്കെ അലഞ്ഞുതിരിഞ്ഞു.

സമയം: ഏഴര
കായംകുളത്തെത്തി. പത്തനാപുരത്തേക്ക് ബസ്സ് കാത്തുനിന്നു. ഇത്തവണയും നിര്‍ഭാഗ്യം എന്‍റെ ഒപ്പം തന്നെയായിരുന്നു. ഇന്നിനി ബസ്സില്ലത്രേ! അവസാനം അതുവഴിവന്ന ഒരു പാണ്ടിലോറിയില്‍ ഇടിച്ചു കേറി പത്തനാപുരത്ത് പത്തുമണിയോടെത്തി.

നല്ലൊരു ദിവസം സമ്മാനിച്ച പ്രിയകൂട്ടുകാരേ നിങ്ങള്‍ക്കെന്‍റെ നന്ദി!
മീറ്റിനും ഈറ്റിനും, എന്‍റെ മാര്‍ക്ക് 9/10

അന്നുമൊരു തിങ്കളാഴ്ചയായിരുന്നു....

2011-07-20T12:42:00.000+05:30

1950 ജനുവരി 30 ഏത് ദിവസം?

എ. തിങ്കള്‍ ബി. ചൊവ്വ

സി. ബുധന്‍ ഡി. വ്യാഴം

ഇന്ന് പല മത്സര പരീക്ഷകളിലും കാണാറുള്ള ഒരു ചോദ്യത്തിനുദാഹരണമാണ് മുകളിലെഴുതിയിരിക്കുന്നത്. തീയതി തന്നിട്ട് ദിവസം കണ്ടുപിടിക്കുന്നതിനുപയോഗിക്കുന്ന ഒരു രീതിയാണ് താഴെക്കൊടുക്കുന്നത്.

ഒരു തീയതി ഏത് ദിവസമാണെന്ന് കണ്ടുപിടിക്കുന്നതിന്....

ഘട്ടം ഒന്ന്- അതിന് തൊട്ടുമുമ്പുള്ള 400 കൊണ്ടുഭാഗിക്കാന്‍ പറ്റുന്ന വര്‍ഷമേതാണെന്ന് നോക്കുക. (1200, 1600,2000, 2400 etc.) കണ്ടുപിടിക്കേണ്ട തീയതിയെ ആ വര്ഷത്തിനടിസ്ഥാനമാക്കിയെഴുതുക

1950 ജനുവരി 30

ഈ തീയതിക്ക് തൊട്ടുമുമ്പുള്ള നാനൂറ് കൊണ്ട് ഹരിക്കാനാവുന്ന വര്‍ഷം 1600 ആണ്. അതുകൊണ്ട്

1600

300 വര്‍ഷം

49 വര്‍ഷം

30 ദിവസം

1415 ജനുവരി 10

1200

200 വര്‍ഷം

14 വര്‍ഷം

10 ദിവസം

2115 ജനുവരി 10

2000

100 വര്‍ഷം

14 വര്‍ഷം

10 ദിവസം

ഘട്ടം രണ്ട്- ഒറ്റദിവസങ്ങള്‍ കണ്ടുപിടിക്കുക(ഒറ്റ ദിവസങ്ങളെന്താണെന്ന് താഴെ പറയുന്നുണ്ട്)

100 വര്‍ഷങ്ങള്‍ക്ക് ഒറ്റദിവസങ്ങള്‍ 5

200 വര്‍ഷങ്ങള്‍ക്ക് ഒറ്റദിവസങ്ങള്‍ 3

300 വര്‍ഷങ്ങള്‍ക്ക് ഒറ്റദിവസങ്ങള്‍ 1

ഇത് താഴെയായി എഴുതുക

1950 ജനുവരി 30

1600	300 വര്‍ഷം	49 വര്‍ഷം	30 ദിവസം
	300 വര്‍ഷം		30 ദിവസം
ഒറ്റദിവസം	1

ഘട്ടം മൂന്ന്- അധിവര്‍ഷങ്ങളും സാധാരണ വര്‍ഷങ്ങളും കണ്ടുപിടിക്കുക

അടുത്ത കോളത്തിലുള്ള വര്‍ഷത്തെ(49 വര്‍ഷം) നാലുകൊണ്ട് ഹരിക്കുക. കിട്ടുന്ന പൂര്‍ണ്ണ സംഖ്യ(12) ആ വര്‍ഷങ്ങള്‍ക്കുള്ളിലെ അധിവര്‍ഷങ്ങളുടെ എണ്ണമായിരിക്കും. അധിവര്‍ഷങ്ങളുടെ എണ്ണം ആ വര്‍ഷത്തില്‍ നിന്ന് കുറച്ചാല്‍ അതിലടങ്ങിയിരിക്കുന്ന സാധാരണ വര്‍ഷങ്ങളെത്രയെന്ന് കിട്ടും (49-12 = 37)

1600	300 വര്‍ഷം	49 വര്‍ഷം		30 ദിവസം
	300 വര്‍ഷം	12 അധിവര്‍ഷം	37 സാധാരണ വര്‍ഷം	30 ദിവസം
ഒറ്റദിവസം	1

ഘട്ടം നാല്- അധിവര്‍ഷത്തിലെയും സാധാരണവര്‍ഷത്തിലെയും ഒറ്റദിവസങ്ങള്‍‍

അധിവര്‍ഷങ്ങള്‍ക്ക് അതിന്‍റെ ഇരട്ടി ഒറ്റദിവസങ്ങളുണ്ടാകും(12X2=24)

സാധാരണ വര്‍ഷങ്ങളിലുള്ള ഒറ്റദിവസങ്ങള്‍ ആ വര്‍ഷങ്ങളുടെ എണ്ണത്തിന് തുല്യമായിരിക്കും. അത് എഴുതുക

1600	300 വര്‍ഷം	49 വര്‍ഷം		30 ദിവസം
	300 വര്‍ഷം	12 അധിവര്‍ഷം	37 സാധാരണ വര്‍ഷം	30 ദിവസം
ഒറ്റദിവസം	1	24	37

അഞ്ച്- ദിവസങ്ങളിലെ ഒറ്റദിവസങ്ങള്‍

ദിവസങ്ങളിലെ ഒറ്റദിവസം കാണാന്‍ അതിനെ 7 കൊണ്ടു ഹരിക്കുക (30/7) അപ്പോള്‍ കിട്ടുന്ന ശിഷ്ടമാണ്(2) അതിലെ ഒറ്റദിവസങ്ങള്‍

1600	300 വര്‍ഷം	49 വര്‍ഷം		30 ദിവസം
	300 വര്‍ഷം	12 അധിവര്‍ഷം	37 സാധാരണ വര്‍ഷം	30 ദിവസം
ഒറ്റദിവസം	1	24	37	2

ഘട്ടം അഞ്ച്- ആകെ ഒറ്റദിവസങ്ങള്‍

ആകെ ഒറ്റദിവസങ്ങള്‍ കണ്ടുപിടിക്കുക =1+24+37+2 = 64

ഘട്ടം ആറ്- തീരാറായി..

ആകെ ഒറ്റദിവസങ്ങള്‍ ഏഴില്‍ കൂടുതലാണെങ്കില്‍ അതിനെ ഏഴുകൊണ്ട് ഹരിക്കുക(64/7) . ശിഷ്ടം(1) കണ്ടുപിടിക്കുക. ശിഷ്ടം കിട്ടുന്ന സംഖ്യയാണ് ദിവസത്തെക്കുറിക്കുന്നത്

ശിഷ്ടം	0	1	2	3	4	5	6
ദിവസം	Sunday	Monday	Tuesday	Wednesday	Thursday	Friday	Saturday

അതായത് 1950 ജനുവരി 30 തിങ്കളാഴ്ചയാണ്.

ഉദാഹരണം രണ്ട്

2012 ജൂലായ് 31

(ഇത് അധിവര്‍ഷമാണ്. നാലുകൊണ്ട് ഹരിക്കുമ്പോള്‍ ശിഷ്ടം പൂജ്യമാണെങ്കില്‍ അത് അധിവര്‍ഷമായിരിക്കും. ഫെബ്രുവരിയില്‍ 29 ദിവസങ്ങളുണ്ടാകും)

2000	11 വര്‍ഷം		213 ദിവസം
	2 അധിവര്‍ഷം	9 സാധാരണ വര്‍ഷം	213 ദിവസം
ഒറ്റദിവസം	4	9	3

ആകെ ഒറ്റദിവസങ്ങള്‍ 16. ഏഴുകൊണ്ട് ഹരിക്കുമ്പോള്‍ ശിഷ്ടം 2.

അതായത് ചൊവ്വാഴ്ചയാണ് 2012 ജൂലായ് 31

ഒരു തീയതിയിലെ ദിവസം(2011 July 20 ബുധന്‍) തന്നിട്ടാണ് മറ്റൊരുതീയതിയുടെ ദിവസമേതെന്ന് (2011 August കണ്ടുപിടിക്കേണ്ടതെങ്കില്‍....

ദിവസമേതെന്ന് തന്നിട്ടുള്ള തീയതിമുതല്‍ കണ്ടുപിടിക്കേണ്ട തീയതിവരെയുള്ള ദിവസങ്ങള്‍ കണ്ടുപിടിക്കുക. ആ ദിവസങ്ങളുടെ എണ്ണത്തെ 7 കൊണ്ട് ഹരിക്കുക. ശിഷ്ടം പൂജ്യമാണെങ്കില്‍‍ തന്നിട്ടുള്ള ദിവസം തന്നെയാകും കണ്ടുപിടിക്കേണ്ടതും. പൂജ്യമല്ലെങ്കില്‍ തന്നിട്ടുള്ള ദിവസം തൊട്ട് എണ്ണുക.

ഉദാഹരണം ഒന്ന്

തന്നിട്ടുള്ള ദിവസം ബുധനാണെങ്കില്‍

ശിഷ്ടം	0	1	2	3	4	5	6
ദിവസം	Wednesday	Thursday	Friday	Saturday	Sunday	Monday	Tuesday

2011 July 20 ബുധന്‍ ആണെങ്കില്‍ 2011 August 20 ഏതു ദിവസം?

ജൂലായില്‍ ബാക്കിയുള്ള ദിവസങ്ങള്‍ 11

ആഗസ്റ്റിലെ ദിവസങ്ങള്‍ 20

ആകെ ദിവസങ്ങള്‍ =31

31 നെ ഏഴുകൊണ്ട് ഹരിച്ചാല്‍ ശിഷ്ടം 3. അപ്പോള്‍ ശനിയാഴ്ച

ഉദാഹരണം രണ്ട്

2011 August 20 ശനിയാഴ്ചയാണെങ്കില്‍‍ 2011 ഡിസംബര്‍ 20 ഏതു ദിവസം?

ആഗസ്ററില്‍ ബാക്കിയുള്ള ദിവസങ്ങള്‍‍- 11

സെപ്തംബറിലുള്ള ദിവസങ്ങള്‍- 30

ഒക്ടോബറിലെ ദിവസങ്ങള്‍- 31

നവംബറിലെ ദിവസങ്ങള്‍- 30

ഡിസംബര്‍ 20 വരെ ദിവസങ്ങള്‍- 20

ആകെയുള്ള ദിവസങ്ങള്‍ = 122

ഏഴുകൊണ്ട് ഹരിക്കുമ്പോള്‍(122/7) ശിഷ്ടം = 3

ഇവിടെ ശിഷ്ടം പൂജ്യമായാല്‍ ശനിയാഴ്ച. ബാക്കിയുള്ള ദിവസങ്ങള്‍ കണ്ടുപിടിക്കാന്‍ ശനിയാഴ്ച കഴിഞ്ഞ് എണ്ണണം

ശിഷ്ടം	0	1	2	3	4	5	6
ദിവസം	Saturday	Sunday	Monday	Tuesday	Wednesday	Thursday	Friday

അപ്പോള്‍ അന്ന് ചൊവ്വാഴ്ചയാണ്

മനസ്സിലായോ ആവോ... ആ...

മനസ്സിലായെങ്കി കുറച്ചുകൂടി കാര്യങ്ങള്‍ കൂട് കേള്....

400 കൊണ്ട് ഭാഗിച്ചാല്‍ ശിഷ്ടം പൂജ്യം കിട്ടുന്ന എല്ലാവര്‍ഷകളിലെയും ഡിസംബര്‍ 31 ‍ഞായര്‍ ആയിരിക്കും

അധിവര്‍ഷം(leap year) എന്നാല്‍ 366 ദിവസങ്ങളുള്ള വര്‍ഷമാണ്. ആ വര്‍ഷത്തില്‍ ഫെബ്രുവരിക്ക് 29 ദിവസം ഉണ്ടാകും. ഒരു വര്‍ഷത്തെ 4 കൊണ്ടു ഭാഗിക്കുമ്പോള്‍ ശിഷ്ടം പൂജ്യമാണെങ്കില്‍ അത് അധിവര്‍ഷം ആയിരിക്കും.

സാധാരണ വര്‍ഷങ്ങളില്‍ 365 ദിവസങ്ങളാണുണ്ടാകുക.

ഒറ്റദിവസങ്ങള്‍ എന്നതുകൊണ്ട് ഉദ്ദേശിക്കുന്നത്.....

ഇരുപെത്തെട്ട് ദിവസങ്ങളുള്ള ഒരു മാസമാണെങ്കില്‍ അതില്‍ നാല് പൂര്‍ണ്ണമായ ആഴ്ചകളുണ്ടാകും. എന്നുവച്ചാല്‍ ഏഴ് ദിവസങ്ങളുള്ള നാലു ആഴ്ചകളായി നമുക്കതിനെ കണക്കാക്കാം. ഉദാഹരണത്തിന് 2011 ഫെബ്രുവരിയില്‍ ചൊവ്വയില്‍ തുടങ്ങി തിങ്കളില് അവസാനിക്കുന്ന ഏഴുദിവസങ്ങളുടെ നാല് ആഴ്ചകള്‍

പക്ഷേ ജൂലായ് മാസത്തില്‍ നാല് പൂര്‍ണ്ണമായ ആഴ്ചകളും(വെള്ളിയില്‍ തുടങ്ങി വ്യാഴത്തില്‍ അവസാനിക്കുന്നു) മൂന്ന് അധിക ദിവസങ്ങളുമുണ്ട്.

പൂര്‍ണ്ണമായ ആഴ്ചയാക്കി കണക്കാക്കാന്‍ പറ്റാത്ത ദിവസങ്ങളാണ് ഒറ്റദിവസങ്ങള്‍. ഇത് കണ്ടുപിടിക്കാന്‍ ആകെയുള്ള ദിവസങ്ങളെ 7 കൊണ്ടു ഹരിക്കുക. ശിഷ്ടം എത്രയോ അതായിരിക്കും ഒറ്റ ദിവസങ്ങളുടെ എണ്ണം.

	ദിവസങ്ങള്‍	ഒറ്റ ദിവസങ്ങള്‍
ജനുവരി	31	3
ഫെബ്രുവരി	28	0
ഫെബ്രുവരി	29	1
മാര്‍ച്ച്	31	3
ഏപ്രില്‍	30	2
മെയ്	31	3
ജൂണ്‍	30	2
ജൂലായ്	31	3
ആഗസ്റ്റ്	31	3
സെപ്തംബര്	30	2
ഒക്ടോബര്‍	31	3
നവംബര്‍	30	2
ഡിസംബര്‍	31	3
അധിവര്‍ഷം	366	2
സാധാരണ വര്‍ഷം	365	1

അപ്പോ അങ്ങനാണ് അവാഗാഡ്രോസംഖ്യയുണ്ടായത്

2011-06-14T14:19:00.002+05:30

പുറത്ത് നല്ലമഴ. ഇന്നും മഴയായിരിക്കുമെന്നറിഞ്ഞിരുന്നെങ്കില്‍ കുപ്പീലിരുന്ന മരുന്ന് മൊത്തോം ഇന്നലെത്തന്നെ ഡൈലൂട്ട് ചെയ്യേണ്ടിയിരുന്നില്ലെന്ന് വെറുതേയോര്‍ത്തു. പുതപ്പൊന്നൂടെ വലിച്ച് മേത്തേക്കിട്ട് ചുരുണ്ടുകൂടിക്കിടന്നു. ഒന്ന് മയങ്ങി..

“അവനവന്‍കുഴിക്കുന്ന കുഴികളില്‍ വീഴുമ്പോ ഗുലുമാല്‍‍....

അവനവന്‍കുഴിക്കുന്ന കുഴികളില്‍ വീഴുമ്പോ ഗുലുമാല്‍‍..”

ഫോണടിച്ചതാ. എടുത്തുനോക്കിയപ്പോ പണ്ട് കൂടെപ്പഠിപ്പിച്ചിരുന്ന ശശി!

“അളിയാ എനിക്ക് നെന്നെക്കൊണ്ടാരാവശ്യമൊണ്ട്."

"ഓ.. എന്തുവാ പറ. ക്യൂ നിക്കാനൊന്നും എന്നെക്കൊണ്ടു പറ്റുകേലേ..ഇപ്പഴേ പറഞ്ഞേക്കാം"

"അതൊന്നുമല്ലടാ.. ഈ അവാഗാഡ്രോ നമ്പരില്ലേ. അതെങ്ങനാ അതിന് 6.02 x 10²³ നമ്പറു തന്നെ വന്നേ? ഇന്നൊരു ചെറുക്കന്‍ ഈ ചോദ്യം ചോയിച്ചപ്പോ ഞാനുടെനെ ഫോണ്‍ വന്നെന്നും പറഞ്ഞ് ക്ലാസ്സിന് പുറത്തിറങ്ങി നിക്കുവാ"

"ബുഹഹാ... ബൂഹാഹാ.. കോപ്പിയടിച്ച് പരൂഷജയിച്ചപ്പോ ഇതൊക്കെ ഓര്‍ക്കണാരുന്നു. എലിയും ട്രാന്‍സ്സോട്ടുമെന്താന്നാ അറിയാതെയാണോടെ പഠിപ്പിക്കാനിറങ്ങുന്നത്...?" (ഇതേ ഡയകോല്‍ വേറൊരാള്‍ ഇന്നലെക്കൂടി എന്‍റെ മൊഹത്തുനോക്കിപ്പറഞ്ഞതാ. അത് ഒരുത്തന് മടക്കിക്കൊടുത്തപ്പോ ഒരു പുതിന്‍ഹര തിന്ന ആശ്വാസം)

"അളി.. നീ ഹെല്‍പ്പ്. വൈയിട്ട് തീര്‍ച്ചായും നമ്മക്ക് കാണാം.."

"വ്വോ.. പറഞ്ഞ് പറ്റീക്കില്ലല്ലാ.."

"ഇല്ലടേ ഞാന്‍ വരാം...വരും.. വന്നിരിക്കും.."

"എന്നാപ്പിന്നെ ഒരു പേനേംപ്പേപ്പറുമെടുക്കിന്‍.. ‍ഞാമ്പറയുന്നത് കുറിച്ച് വെച്ചോണം.. ഓക്കേ..

രാസപദാര്‍ത്ഥങ്ങളുടെ അളവ് പറയാനുപയോഗിക്കുന്ന സംഭവമാണല്ലോ മോള്‍(mole). ഒരു മോളെന്നാല്‍ 6.022 1415 x 10²³ എണ്ണം കണികളാണ്(കണികള്‍ എന്നുപറഞ്ഞാല്‍ ആറ്റം, മോളിക്യൂള്‍, അയോണ്‍ തുടങ്ങിയവ)

തുല്യവ്യാപ്തമുള്ള ഏതുവാതകങ്ങളിലും(നിശ്ചിതതാപനിലയിലും മര്‍ദ്ദത്തിലുമുള്ളപ്പോള്‍) തുല്യ എണ്ണം തന്മാത്രകളുണ്ടാകുമെന്ന് പറയുന്നതാണ് അവാഗാഡ്രോ നിയമം

"ഇതൊക്കെയെനിക്കറിയാം.. നീ ആ സംഖ്യയെങ്ങനാ വന്നേന്ന് പറ"

നീ മുണ്ടരുത്.. അതിലേക്കാണ് ഞാന്‍ വരുന്നത്.. രണ്ടുപാര്‍ട്ടുകളായാണ് ഇത് ഞാമ്പറയുന്നേ.. ഓക്കെ ലെറ്റ് മീ സ്റ്റാര്‍ട്ടേ...
പാര്‍ട്ട് ഒന്ന്--

നെന്‍റെ കയ്യീല്‍ കുറച്ച് ക്രിക്കറ്റ് പന്തുകളും ഇരുമ്പ് പന്തുകളുമുണ്ടെന്ന് വിചാരിക്ക്. ഒരു ക്രിക്കറ്റ് പന്തിന് 1kg ഉം ഇരുമ്പ് പന്തിന് 5kg ഭാരമുണ്ടെന്ന് വിചാരിക്കണം. അതായത് ഇരുമ്പ് പന്തിന് ക്രിക്കറ്റ് പന്തിന്‍റെ അഞ്ചിരട്ടി ഭാരം.

"ഉം."

ങാ ഇനി നൂറ് ക്രിക്കറ്റ് പന്തുകള്‍ ഒരു ബാഗിലിടുക. നൂറ് ഇരുമ്പ് പന്തുകള്‍‍ അടുത്ത ബാഗിലും. ആദ്യത്തെ ബാഗിന് ഇപ്പോ നൂറ് കിലോയും രണ്ടാമത്തെ ബാഗിന് അഞ്ഞൂറ് കിലോയും ഭാരം കാണും.. അതായത് തുല്യഎണ്ണമാണ് ബാഗുകളിലുള്ളതെങ്കില്‍.. ആദ്യത്തെ ബാഗിന്‍റെ ഭാരത്തിന്‍റെ അഞ്ചിരട്ടി രണ്ടാമത്തേതിന്.... ആമൈ റൈറ്റ്?

ഓക്കേ.. ഇനി നമ്മള് എണ്ണം നോക്കുന്നില്ല. രണ്ടുബാഗിലും തോന്നിയപോലെ പന്തുകള്‍ (ഒന്നില്‍ ക്രിക്കറ്റ് പന്ത് മറ്റേതില്‍ ഇരുമ്പ് പന്ത്) വാരിയിടുന്നു. കുറച്ച് കഴിഞ്ഞ് ഭാരം നോക്കിയപ്പോ ക്രിക്കറ്റ് പന്തിരുന്ന ബാഗിന്‍റെ ഭാരം 500 kg, ഇരുമ്പ് പന്തിരുന്ന ബാഗിന് 2500 kg. അതായത് ആദ്യത്തേതിന്‍റെ അഞ്ചിരട്ടി ഭാരം. എന്ത് ഇതില്‍നിന്നും നീ മനസ്സിലാക്കും.

അതായത് രണ്ടിലും തുല്യയെണ്ണം പന്തുകളായിരിക്കും.. അങ്ങനല്ലേ?

യ്യ്യയ്യ്യ.. ഓക്കേ എങ്കി അതിലെത്ര പന്തുകളുണ്ടായിരിക്കുമെന്ന് പറയാവോ?

അത്..അത്.. എങ്ങനാ കണ്ടുപിടിക്കുന്നേ.അതു പറ?

ഡാ അതേ... ഏതെങ്കിലും ബാഗിന്‍റെ ഭാരത്തെ അതിലിട്ടിരിക്കുന്ന ഒരു പന്തിന്‍റെ ഭാരം കൊണ്ടു ഹരിച്ചാമതി എടര്‍ക്കാ...

ഓ അങ്ങനെ... വെയിറ്റ് ‍‍‍ഞാമ്പറയാം...
(500/5=500 or 2500/5=500)
(കാല്‍ക്കുലേറ്ററിന്‍റെ കട്ടകള്‍ ഇടിഞ്ഞു താഴുന്നതിന്‍റെ ശബ്ദം ഞാന്‍ വ്യക്തമായി കേട്ടു)

അളി.. അതപ്പോ അഞ്ഞൂറ് പന്തുകള്‍ കാണും അല്യോ?

ഓ.. തന്നെ... തന്നെ.. ഇനി പാര്‍ട്ട് രണ്ട്

വെള്ളത്തെ വൈദ്യുതവിശ്ലേഷണം നടത്തുമ്പോ ഹൈഡ്രജനും ഓക്സിജനും കിട്ടുമല്ലോ,

അതായത് വെള്ളത്തിന്‍റെഭാരത്തിന്‍റെ 11.11% ഹൈഡ്രജനും 88.89% ഓക്സിജനുമായിരിക്കും.

എന്നുവച്ചാല്‍ ജലത്തിലെ(H2O), രണ്ട് ഹൈഡ്രജന്‍ ആറ്റത്തിന്‍റെയും(H) ഒരു ഓക്സിജന്‍ ആറ്റത്തിന്‍റെയും(O) ഭാരങ്ങളുടെ അംശബന്ധം

11.11:88.89 അല്ലെങ്കില്‍ 1:8 ആയിരിക്കും

ഒരു ഹൈഡ്രജന്‍റെ ആറ്റത്തിന്‍റെ(H) ഭാരം 1 എന്ന് വിചാരിച്ചാല്‍ ഓക്സിജന്‍ ആറ്റത്തിന്‍റെ ഭാരം(H) 16 ആകും (relative mass)

അവാഗാഡ്രോയുടെ നിയമപ്രകാരം,

mass of 1 mole = molecular mass in gram

ദതായത്

ഒരുമോള്‍(1mole) ഓക്സിജന്‍റെ(O2) ഭാരം =32g

ഒരുമോള്‍(1mole) ഹൈഡ്രജന്‍റെ(H2) ഭാരം =2g

ഹൈഡ്രന്‍തന്മാത്രയുടെയും ഓക്സിജന്‍ തന്മാത്രയുടേയും ഭാരങ്ങളുടെ അംശബന്ധം 32:2 ആയിരിക്കും

കൃത്യമായിപറഞ്ഞാല്‍ ആ അംശബന്ധം

O2 : H2 = 32 : 2.016 ആണ്.

അവാഗാഡ്രോനിയമമനുസരിച്ച്, ഒരുമോള്‍(1mole) ഓക്സിജനിലും ഒരുമോള്‍(1mole) ഹൈഡ്രജനിലും തുല്യ എണ്ണം തന്മാത്രകള്‍(molecules) ഉണ്ടാകും. എന്നുവച്ചാല്‍ 32g ഓക്സിജനിലും, 2.016g ഹൈഡ്രജനിലും തുല്യയെണ്ണം തന്മാത്രകളുണ്ടാകും. ആ എണ്ണമാണ് അവാഗാഡ്രോ സംഖ്യ.

ആ എണ്ണം കണ്ടുപിടിക്കണെമെങ്കില്‍ 1 mole ഹൈഡ്രജന്‍റെ ഭാരത്തെ(2.016g) ഒരു ഹൈഡ്രജന് തന്മാത്രയുടെ ഭാരം(3.47x 10^-24g) കൊണ്ടു ഹരിക്കുകയോ, 1 mole ഓക്സിജന്‍റെ ഭാരത്തെ ഒരു ഒരു ഓക്സിജന്‍ തന്മാത്രയുടെ ഭാരം കൊണ്ടു ഹരിക്കുകയോ ചെയ്താല്‍ മതിയാകും. (പാര്‍ട്ട് ഒന്ന്--- ബാഗിന്‍റെ ഭാരവും ഒരുപന്തിന്‍റെ ഭാരവും ഉപയോഗിച്ച് പന്തിന്‍റെ എണ്ണവും കണ്ടുപിടിച്ച രീതി നോക്കുക)

എന്നുവച്ചാല്‍ ഹൈഡ്രജനാണെങ്കില്‍ 2.016 / 3.47x 10^-24 = 6.02 x 10²³

മനസ്സിലായോടേ..? എവിടെ..? വീണ്ടുമ്പറയണാ? "

"വേണ്ടളിയാ.. ഞാനുന്നൂടെ വായിച്ചു നോക്കട്ട്.."

"ഓക്കേ അപ്പ വയിട്ട് കാണുവല്ലേ അല്ലേ.."

"ങും.. കാണാം"

വീണ്ടും പുതപ്പ് വലിച്ചുമൂടിക്കിടന്നു. വയിട്ട് പൊട്ടുന്ന സോഡാക്കുപ്പികളെ സ്വപ്നം കണ്ട് പതുക്കെ ഉറക്കത്തിലേക്ക് ഊളിയിട്ടു...

അടിക്കുറിപ്പ്:

ആക്ചവലി ഈ പോസ്റ്റില്‍ പറഞ്ഞിരിക്കുന്നത് അവാഗാഡ്രോ നമ്പറിന് എന്തുകൊണ്ട് 6.02 x 10²³ ഇങ്ങനൊരു മൂല്യം വന്നത് എന്നുമാത്രമാണ്.
ഇതിന്‍റെ മൂല്യം കണ്ടുപിടിക്കാനായി പരിശ്രമിച്ച പ്രധാനശാസ്ത്രജ്ഞന്‍മാരാണ് പെരിന്‍, ലോഷിമിഡ്, മില്ലിക്കന്‍, ഫാരഡേ തുടങ്ങിയവര്‍. ഇവിടെ ഞെക്കിയാല്‍ അവാഗാഡ്രോസംഖ്യയെപ്പറ്റി കുറച്ചുകൂടി മനസ്സിലാക്കാം

ബൈ ദ ബൈ ഇതുമായി ബന്ധപ്പെട്ട ഒരു ദിനമാണ് അവാഗാഡ്രോദിനം അഥവാ മോള്‍ ദിനം. ഒക്ടോബര്‍ 23, 6:02 AM മുതല്‍ 6:02 PM വരെയാണ് ഈ ദിനം ആചരിക്കുന്നത്. കൂടുതല്‍ ഇവിടെ

എന്നാലും ഒന്നുചെക്കിയേക്കാം..

2010-08-05T23:32:00.000+05:30

ഓരോത്തന്‍മാര് നേരം വെളുക്കുമ്പത്തന്നെ ഫോറങ്ങളുടേം സോഷ്യല്‍ നെറ്റുവര്‍ക്കുകള്‍ടേം ലിങ്കിട്ടുതരും.. മുന്നും പിന്നും നോക്കാതെ എത്രയെണ്ണം പിടിച്ച് ഞെക്കിയിരിക്കുന്നു..എല്ലാം എന്‍റെ കാസ്പര്‍സ്കി ആന്‍റിവൈറസിനെ മാത്രം വിശ്വസിച്ച്....

മാല്‍വേറുകളും വൈറസുകളും ഒക്കെക്കാണുമെന്നൊക്കെ അറിഞ്ഞിട്ടും എന്നും അലാറം വെച്ച് എത്ര കൂതറ സൈറ്റുകളില് കേറുന്നതാ. എന്തായാലും ഇന്നു ആ കടുത്തതീരുമാനം എടുത്തു. മഴമാറിയിട്ട് ഗംപ്ലീറ്റ് ഡീസന്‍റാകണം

അതിന്‍റെ ആദ്യപടിയെന്ന നിലയ്ക്ക്..ഏതൊക്കെ സൈറ്റുകളിലാ കലിപ്പ് മാല്‍വേറുകള്‍ ഉള്ളതെന്നറിയണം. അതിന് എന്തായാലും ഒരു ഫ്രീ സര്‍വ്വീസ് കിട്ടി.. യു.ആര്‍.എല്‍.വോയ്ഡ്. ഈ ഓണ്‍ലൈന്‍ സ്കാനര്‍, ഇരുപത് സെക്യൂരിറ്റി സര്‍വ്വീസുകള്‍ ഉപയോഗിച്ച്, നമ്മളുകൊടുക്കുന്ന സൈറ്റിനെ അടിമുടി സ്കാനും. അപ്പോ അറിയാം ലതിനാത്ത് കേറിയാ പണികിട്ടുവോ ഇല്ലിയോന്ന്...

അതിന്‍റെ ലിങ്കില്‍ പിടിച്ച് ഞെക്കിയപ്പോ ഗൂഗിളിന്‍റെപോലൊരു പേജ് വന്ന്.. ഇനി നുമ്മ തംശയിക്കുന്ന സൈറ്റ് അഡ്രസ് സെര്‍ച്ച് ബാറില്‍ തോണ്ടിയിട്ട് കൊടുക്കാം...

ഞാന്‍ ഇപ്പോ ചെക്കുചെയ്യാന്‍ പോണ സൈറ്റില്‍ ഒരു കുഴപ്പോം ഉണ്ടാവാതെ നോക്കിക്കോണേ പരദേവതകളേ...

ചതിച്ചല്ലോ ദേവീയേ.......

പാരസെറ്റമോള്‍ ഗുളിക കഴിക്കുന്നപോലെ രാവിലേം ഉച്ചക്കും വൈകിട്ടും ലോഗിന്‍ ചെയ്തിരുന്ന സൈറ്റാ.. ലതിന്‍റെ റിസല്‍റ്റ് കണ്ടാ.. എനിക്കുറപ്പാ ദിതില് അട്ടിമറി നടന്നിട്ടുണ്ട്...ഉറപ്പ്.. അല്ലെങ്കി.. (ങീ...ങീ..)

വാല്‍ക്കഷ്ണം

ഉടമയുടെ അനുവാദമില്ലാതെ കമ്പ്യൂട്ടറില് നുഴഞ്ഞുകയറുന്ന സോഫ്റ്റ്‍വേറുകളാണ് മാല്‍വേറുകള്‍. മിക്കവാറും എല്ലാ അശ്ലീലസൈറ്റുകളിലും ഇവയുടെ സാന്നിധ്യം ഉണ്ടാകാറുണ്ട്.

യു.ആര്‍.എല്‍.വോയിഡിന്‍റെ സവിശേഷതകള്‍

തികച്ചും സൗജന്യസേവനമാണ് നല്‍കുന്നത്
വളരെവേഗത്തില്‍ത്തന്നെ സൈറ്റുകളെ സ്കാന്‍ ചെയ്യുന്നു
വിശ്വസിക്കാവുന്ന ഫലങ്ങള്‍ തരുന്നു
ലിങ്കുകളെയും സ്കാന്‍ ചെയ്യാം അതിന് ഇവിടെ ഞെക്കുക
ഇതില്‍ ലഭ്യമായ മറ്റു ടൂളുകള്‍ താഴെക്കാണാം

കടപ്പാട്: വിക്കിടെക്

പ്രപഞ്ചത്തിന്‍റെ പോട്ടം പിടിച്ച്..

2010-08-03T14:13:00.001+05:30

ഇത് പ്രപഞ്ചത്തിന്‍റെ പോട്ടമാണ്...

പ്ലാങ്ക് എടുത്തത്.
എന്താ പ്ലാങ്കിന്‍റെ ബ്ലോഗ് അഡ്രസ് വേണമെന്നോ??

സോറീ... പ്ലാങ്ക് ഒരു ഫോട്ടോബ്ലോഗറല്ല...!!!

പ്ലാങ്ക് എന്നുപറഞ്ഞാല്‍ 2009 ല്‍ യൂറോപ്യന്‍ സ്പെയ്സ് ഏജന്‍സി

വിക്ഷേപിച്ച ഒരു കുഞ്ഞ് ഉപഗ്രഹമാണ്.

ഇത് ഔട്ടര്‍സ്പെയ്സിനെപ്പറ്റി പഠിക്കാനുള്ള ഒരു സ്പെയ്സ് ഒബ്സര്‍വെറ്ററിയാണ്. പ്രപഞ്ചത്തിന്‍റെ ഘടന, രൂപം, പ്രായം ഇത്യാദി കാര്യങ്ങള്‍ മനസിലാക്കാന്‍ പ്ലാങ്ക് സഹായിക്കുമെന്നാണ് കരുതപ്പെടുന്നത്.

അതിനുവേണ്ടി ഏറ്റവും കുറഞ്ഞത് നാലു തവണയെങ്കിലും ആകാശത്തെ സ്കാന്‍ ചെയ്യണമെന്ന് പറഞ്ഞാണ് ഇതിനെ മോളിലോട്ട് എടുത്തിരിക്കുന്നത്.

2009 സെപ്റ്റംബറില്‍ തന്നെ പ്ലാങ്ക് ആദ്യ സെറ്റ് പടംസ് അയച്ചു തന്നിരുന്നു.

ഇപ്പോ ഒരു ഫുള്‍ സ്കൈ പടവും.

നടുക്ക് കാണുന്ന ആ തിളങ്ങുന്ന വരയെന്ന് പറയുന്നത് സൂര്യനും ഭൂമിയും ഒക്കെയടങ്ങുന്ന മില്‍ക്കി വേ ഗാലക്സി തന്നെ...

ഈ പോട്ടവും പിടിച്ച് കുറച്ചുകാലം ശാസ്ത്ര‍ജ്ഞന്‍മാര്‍ക്ക് തലേം ചൊറിഞ്ഞിരിക്കേണ്ടി വരും- ഇതില്‍ നിന്നും വിവരങ്ങള്‍ ചുരണ്ടിയെടുക്കാന്‍...

കൂടുതല്‍ വിവരങ്ങള്‍ താഴെയുള്ള ലിങ്കില്‍ പിടിച്ച് ഞെക്കിയാക്കിട്ടും..

ടെലിഗ്രാഫ്

ബിബിസി ന്യൂസ്

ഹൊ.. യൂനിക്കോഡിന്‍റെ കാര്യത്തില് തീരുമാനമായി..

2010-07-27T23:11:00.007+05:30

രൂപയുടെ പുതിയ ചിഹ്നം യുണികോഡില്‍ ഉള്‍പ്പെടുത്താനുള്ള ഒരു കടമ്പ കഴിഞ്ഞു.

രൂപയുടെ ചിഹ്നത്തിന്, ഇന്ത്യന്‍ ഐ.റ്റി ഡിപ്പാര്‍ട്ട്മെന്‍റ് യൂനിക്കോഡ് കന്‍സോര്‍ഷ്യത്തിന് നിര്‍ദ്ദേശിച്ച കോഡ് പോയിന്റ് U+0971 ആണ്..
അത് കീബോര്‍ഡില്‍ ദോ ലവിടായിട്ടു വരുമെന്ന് പ്രതീക്ഷിക്കുന്നു.

രൂപയുടെ ചിഹ്നത്തിനെപ്പറ്റിയുള്ള കൂടുതല്‍ വിവരങ്ങള്‍ ദാ താഴെയുള്ള ഉദയകുമാറിന്‍റെ പ്രസന്‍റേഷനില്‍ കാണാം..

സംഭവം റെഡിയായാല്‍ മറ്റേതെങ്കിലും ഫോണ്ടുകൂടാതെ തന്നെ സാധാരണ കീ ബോര്‍ഡില്‍ രൂപയുടെ ചിഹ്നം ടൈപ്പു ചെയ്യാന്‍ പറ്റും..

പക്ഷേ അതിന് ഇനിയും മാസങ്ങളെടുക്കും... എന്തായാലും കാത്തിരിക്കാം...

മലയാളത്തില് വായിച്ചിട്ട് മനസിലായില്ലെങ്കി ദാ ഇവിടെ ഞെക്കിയാ ഇതേ സാധനം ഇംഗ്ലീഷിലും വായിക്കാം.

വാല്‍ക്കഷ്ണം
കാസര്‍ഗോഡന്‍ പിള്ളേരും വയനാടന്‍ ടീമുമൊക്കെയുണ്ടാക്കിയ ഫോണ്ടുകളൊക്കെ കിടിലം തന്നെ അണ്ണാ...ബട്ട്...

രൂപയുടെ ചിഹ്നം ഔദ്യോഗികമായി അംഗീകരിച്ച് മണിക്കുറുകള്‍ക്കകം ഫോണ്ട് അപ്‍ലോഡു ചെയ്ത ആ പാവം വടക്കേ ഇന്ത്യക്കാരന്‍ ചെക്കനെ ആരും മറക്കരുത് കേട്ടാ..

ജൂലായ് 15 ന് ആ വടക്കേഇന്ത്യക്കാരന്‍ ചെക്കന്‍ ഉണ്ടാക്കിയ ഫോണ്ട് ഇവിടെക്കാണം.....

എന്‍റെ ഓര്‍മ്മ ശരിയാണെങ്കില്‍ കാസര്‍ഗോഡന്‍സ് പിള്ളേര് ഫോണ്ട് ജൂലൈ 16 നാണ് അപ്‍ലോഡിയത്. ജൂലായ് 26 ന് വയനാടന്‍ ടീമും ഈ സാധനം ഉണ്ടാക്കിയെന്ന് പറയപ്പെടുന്നു

ഇനി ഋ അടിക്കാന്‍ ബുദ്ധിമുട്ട് വരുമെന്ന് പറയുന്നവര്‍ക്ക് വേണ്ടി
സെബിന്‍ ജേക്കബ് നല്‍കുന്ന വിശദീകരണം.
ഋ എഴുതാന്‍ ഒരു പ്രയാസവും വരില്ല. യൂണിക്കോഡില്‍ ഒരു കോഡ് പോയിന്റാണു് അസൈന്‍ ചെയ്യുന്നതു്. അതു് കീബോര്‍ഡില്‍ ഏതെങ്കിലും ഒരു കീയിലേക്കോ ഒരു കോമ്പിനേഷനിലേക്കോ മാര്‍ക്കു ചെയ്യുന്നതു് കീബോര്‍ഡ് ലേഔട്ട് ഉണ്ടാക്കുന്നവരാണു്. സ്വനലേഖയില്‍ ഋ എഴുതാന്‍ ^ ഉപയോഗിക്കുന്നുണ്ടാവും. അതേ സമയം ഇന്‍സ്ക്രിപ്റ്റില്‍ + ആണുപയോഗിക്കുന്നതു്. വേറൊരാള്‍ക്കു് മറ്റൊരു കീയില്‍ നല്‍കാം. ഇന്‍പുട്ട് മെഥേഡ് അനുസരിച്ചു് കീബോര്‍ഡിലെ അതിന്റെ സ്ഥാനം മാറുമെന്നര്‍ത്ഥം. എന്നാല്‍ ഏതു് ഇന്‍പുട്ട് മെഥേഡില്‍ കൂടി നല്‍കിയാലും വാല്യുവില്‍ മാറ്റവുമില്ല.

ഇതും ആസ്കി ഹാക്കും തമ്മിലുള്ള വ്യത്യാസമെന്തെന്നുവച്ചാല്‍, ആസ്കി ഫോണ്ടില്‍ ഒരിടത്തെഴുതിയതു് ആ ഫോണ്ടില്ലാതെ വേറൊരിടത്തു് കാണാനാവില്ല. അതേ സമയം യൂണിക്കോഡ് ക്യാരക്ടറാവുമ്പോ, അതു് യൂണിക്കോഡ് ഫോണ്ടുകളില്‍ സ്ഥാനം പിടിക്കും. അപ്പോള്‍ നിങ്ങളുപയോഗിക്കുന്ന ഫോണ്ടുതന്നെ ഉപയോഗിക്കണമെന്നില്ല, എനിക്കു്. എന്റെ സിസ്റ്റത്തില്‍ നിങ്ങളുടെ ഫോണ്ട് ഉണ്ടാവണമെന്നു തന്നെയില്ല.

ഒന്നൂടെ കടത്തിപ്പറഞ്ഞാല്‍ ആസ്കി ഹാക്കു് ചുമ്മാ ഇംഗ്ലീഷ് അക്ഷരസ്ഥാനത്തു് ഒരു പടം വെട്ടിയൊട്ടിക്കുന്ന പരിപാടിയാണു്. ഒരു തരം മാസ്ക്യുറേഡിങ്. അതേ സമയം യൂണിക്കോഡ്, ആ ക്യാരക്ടറിനു സ്വന്തമായി ഒരു ഇരിപ്പിടം നല്‍കുകയാണു്. അതിനു് ആ ഒരൊറ്റ മുഖമേയുള്ളൂ, മുഖംമൂടിയില്ല

ഇങ്ങനേം ബ്ലോഗ് വായിക്കാം..

2010-07-23T11:33:00.004+05:30

ബിസിയായത് കാരണം പുതിയ ബ്ലോഗുകള് വായിക്കാന്‍ സമയം തീരെക്കിട്ടുന്നില്ല.. പിന്നെ വായിക്കാന്‍ വേണ്ടി ഇതെല്ലാം

ബ്രൗസറില്‍ ബുക്ക് മാര്‍ക്ക് ചെയ്തു വയ്ക്കുകയെന്നുപറഞ്ഞാ ഒരുമാതിരി കച്ചടപരിപാടിയാ.. ഇനിയെന്തെങ്കിലും പുതിയ മാര്‍ഗ്ഗം കണ്ടെത്തിയേ പറ്റൂ... എന്തായാലും ഒരു സാധനം കിട്ടിയിട്ടുണ്ട്...ഒന്നു പരീക്ഷിച്ചു നോക്കിയേക്കാം...

ങാ.. അതിന്‍റെ ലിങ്കിലു പിടിച്ചു ഞെക്കി...

ഇനിയൊരു അക്കൗണ്ട് ഓപ്പണ്‍ചെയ്യണം...ഇമെയിലോ യൂസര്‍നേമോ കൊടുക്കണം.

മതി പണിതീര്‍ന്നു. ഇമെയില്‍ കണ്‍ഫര്‍മേഷന്‍ ഒന്നുമില്ലാത്തതുകൊണ്ട് രക്ഷപെട്ടു.

ഇനി ലത് രണ്ടും ബുക്ക്മാര്‍ക്ക് ബാറിലേക്ക് ഡ്രാഗ്ചെയ്ത് പിടിപ്പിക്കണം.

അങ്ങനെ കാര്യങ്ങള് സെറ്റായി.. ഇനി പിന്നീട് വായിക്കാമെന്ന് വിചാരിക്കുന്ന പേജില് നിന്ന് ബുക്ക്മാര്‍ക്ക് ബാറിലുള്ള Read Later ല്‍ വെറും ഒറ്റ ഞെക്കു ഞെക്കിയാല്‍ ആ പേജ് സേവാകും..

ബ്രൗസറില്‍ ഒരു പേജ് വീണ്ടും ബുക്ക്മാര്‍ക്ക് ചെയ്യാന്‍ നോക്കിയാല്‍ ഡ്യൂപ്ലിക്കേറ്റ് ബുക്ക്മാര്‍ക്കിംഗിന് സാധ്യതയുണ്ട്.. പക്ഷേ ഇതില് നേരത്തെസേവുചെയ്തിട്ടുള്ള ഒരു പേജ് വീണ്ടും സേവു ചെയ്യാന്‍ നോക്കിയാല്‍ അത് അപ്ഡേറ്റഡ് എന്ന് മാത്രമേ കാണിക്കൂ.. എന്നുപറഞ്ഞാ ഡ്യൂപ്ലിക്കേറ്റ് ചെയ്യില്ലാന്ന്..

പിന്നെ സെവുചെയ്തു വച്ചിരിക്കുന്നത്, വായിക്കണമെന്ന് തോന്നുമ്പോ, ബുക്ക് മാര്‍ക്ക് ബാറിലുള്ള Instapaper ല് ഞെക്കിയാ ഇതുവരെ സേവു ചെയ്തിരിക്കുന്നത് കാണാന്‍ പറ്റും..

വായിച്ച് കഴിഞ്ഞ് അതിനെ ഡിലീറ്റു ചെയ്യാം..സ്റ്റാര്‍ ചെയ്തു വയ്ക്കാം..
വേണമെങ്കില്‍ ഈ പേജുകളെയൊക്കെ വളരെ ഈസിയായി ഫോള്‍ഡറുകളിലിട്ട് തരം തിരിച്ച് സൂക്ഷിക്കുകേം ചെയ്യാം.. ..

ടെക്സ്റ്റ് മാത്രം കണ്ടാല്‍ മതിയെങ്കില്‍ അതിനും ഓപ്ഷനുണ്ട്. ഇതിനെയൊക്കെ വേണമെങ്കി ആര്‍ക്കൈവ് ചെയ്യുകേം ചെയ്യാം.... അത് കലക്കി...

ഇത് ഒരു ഓണ്‍ലൈന്‍ സര്‍വ്വീസായതുകൊണ്ട്, ഇമെയില്‍ അഡ്രസ് (പാസ്‍വേഡ് ഇട്ടിട്ടുണ്ടെങ്കില്‍ അതും) അടിച്ച് ഏത് കമ്പ്യൂട്ടറില്‍ നിന്നും സേവുചെയ്തുവച്ചിരിക്കുന്ന പേജുകള്‍ വായിക്കാം..

എനിച്ചിത് ഫയങ്കര ഇഷ്ടായി

ദാണ്ടകിടക്കുന്നു നിങ്ങടെ രൂഫാ...

2010-07-15T14:39:00.019+05:30

ഇല്ലോളം താമയിച്ചാലും നുമ്മ രൂഫയ്ക്കും കിട്ടി.. ഒരു ചിഹ്നം....

കഴിഞ്ഞമാര്‍ച്ചിലാണ് രൂപയ്ക്കും സിംബല് വേണം... സിംബല് വേണം എന്നുപറഞ്ഞ് സര്‍ക്കാര് മുറവിളി തുടങ്ങിയത്...
എന്തായാലും പുതിയ സിംബല്‍ ഇന്ന് അപ്രൂവ് ചെയ്തു..

അംബിക ആന്‍റി പറയുന്നത് ശ്രദ്ധിക്കൂ....

"ഇനിയിത് നോട്ടിലും നാണയത്തിലുമൊക്കെ കാണാം കേട്ടോ...."

ഗോഹട്ടി ഐ.ഐ.റ്റി പ്രൊഡക്ടായ ഡി.ഉദയകുമാറാണ് ഈ ചിഹ്നം രൂപകല്‍പന ചെയ്തത്.... ങും... എനിക്കു കിട്ടേണ്ട 2.5 ലക്ഷം രൂപ ഉദയന്‍ കൊണ്ടുപോയീന്ന് പറഞ്ഞാമതിയല്ലോ.....

തെരഞ്ഞടുത്ത അവസാന അഞ്ചില്‍, തലശ്ശേരിക്കാരനായ ഷിബിന്‍ കെ.കെ യുടെ സൃഷ്ടിയുമുണ്ടായിരുന്നു...

അവസാന ലിസ്റ്റിനെപ്പറ്റി
സാമ്പത്തിക മന്ത്രാലയത്തിന്‍റെ സൈറ്റില്‍ നിന്നുമുള്ള ആ വിവരം...
ദാണ്ടെ കെടക്കുന്നു....

ഈ ഷിബിനെന്ന് പറയുന്നത്, കണ്ണൂരില്‍ തലശ്ശേരിക്കടുത്ത് ഒരു ഹയര്‍ സെക്കണ്ടറി സ്കൂളില്‍ +2 അദ്ധ്യാപകനാണെന്നെ..
പോരാത്തതിന് ഒരു തകര്‍പ്പന്‍ ഡിസൈനറും......
ശ്ശൊ...ഞാനും ഒരു തകര്‍പ്പന്‍ ഡിസൈനറാ....
ഒരു സിംബല്‍ അയച്ചിരുന്നെങ്കില്‍ ഈ ബ്ലോഗില്‍ എനിക്കു തന്നെ ആശംസകള്‍ നേരാമായിരുന്നു..

ഷിബിന്‍റെ സൃഷ്ടിയും അതിന്‍റെ വിശദാംശങ്ങളും ഇവിടെക്കാണാം...

ഇവിടെ ഉദയകുമാറിന്‍റെ സൈറ്റും....

ഇവിടെ ഞെക്കിയാല്‍ രൂപയുടെ ഫോണ്ട് ഇന്‍സ്റ്റാളാം...

ഞാന്‍ ചെയ്തു നോക്കി കേട്ടോ...

ഇനി ഈ ഫോണ്ടുള്ള വേര്‍ഡ് ഡോക്കുമെന്‍റ് ആര്‍ക്കെങ്കിലും അയച്ചുകൊടുക്കുവാണെങ്കി, അവര് ഈ ഫോണ്ട് ഇന്‍സ്റ്റാളിയിട്ടുണ്ടെങ്കിലേ കാണാന്‍ പറ്റൂള്ള.. ഫോണ്ട് ഇന്‍സ്റ്റാളാതെ മറ്റുള്ളവര്‍ക്ക് ഇത് കാണണമെങ്കില്‍ MS-word ല്‍ Office menu ( Top Left ) ഞെക്കിയാ word option എന്നൊരു സാധനം കാണാന്‍ പറ്റും.. ദതില് save എന്നൊരു ടാബ് കാണും.. അവിടെ Preserve Fidelity when sharing the document എന്നതില്‍ താഴെക്കാണുന്നപോലെ ചെയ്താല്‍ മതി

ബ്രെത്ത് അനലൈസറിനൊരുമ്മ...ഉമ്മ.....

2010-07-11T14:39:00.003+05:30

"...വെറുതയല്ലടോ..ഫോര്‍ മള്‍ട്ടിഫേറിയസ് ചാര്‍ജ്ജസ്...ദാറ്റിസ്..ഫോര്‍ ഡ്രൈവിംഗ് അണ്ടര്‍ ദ ഇന്‍ഫ്ലുവന്‍സ് ഓഫ് ആല്‍ക്കഹോള്‍.. സെക്ഷന്‍ 185 മോട്ടോര്‍ വെഹിക്കിള്‍സ് ആക്ട്..പണിഷബിള്‍ ആക്ട് പെര്‍ സെക്ഷന്‍ 279 ഒഫ് ദ ഇന്‍ഡ്യന്‍ പീനല്‍ കോഡ്..."

മമ്മൂട്ടിയുടെ കിംഗ് പതിനൊന്നു പ്രാവശ്യം കണ്ടിട്ടുള്ളതുകൊണ്ട്കള്ളുകുടിച്ച് വണ്ടിയോടിച്ചാല് ഏതൊക്കെ വകുപ്പിനാ കേസ് ചാര്‍ജ്ജ് ചെയ്യുന്നേന്ന് പച്ചവെള്ളംപോലെ പഠിച്ചു.

മൂന്നുനാലു വര്‍ഷത്തിനുമുമ്പുവരെ കള്ളുകുടിച്ച് വണ്ടിയോടിക്കുന്നവന്‍മാരെ കണ്ടുപിടിക്കാന്‍-മീനാക്ഷി ശേഷാദ്രി, ഊര്‍മ്മിള മണ്ഡോദ്കര്‍ തുടങ്ങിയ എഴുതാന്‍ പോലും പറ്റാത്ത വാക്കുകള് പറയിപ്പിക്കുക എന്ന തികച്ചും പ്രാക്ടിക്കലായ മാര്‍ഗ്ഗമാണ് കേരള പോലിസ് ഉപയോഗിച്ചുകൊണ്ടിരുന്നത്...

‌എന്നാല്‍ ഇപ്പോ കേരളപോലിസും സ്മാര്‍ട്ടായി... ബ്രെത്ത് അനലൈസര്‍ ഉപയോഗിച്ചാണ് ഇപ്പോ കള്ളുകുടിയന്‍മാര്‍ക്ക് പണികൊടുക്കുന്നത്...അതിലേക്ക് ഊതിക്കഴിഞ്ഞ് കീകീയെങ്ങാനം കേട്ടാല്‍ ചെവിക്കല്ല്പൊളക്കെ അടിയുംതന്ന് വണ്ടീല് കേറ്റി അടുത്ത ആശുപത്രിയില് കൊണ്ടു പോവും.. പിന്നെ ബ്ലഡ് ടെസ്റ്റ്, പിഴ, കേസ്, ജാമ്യം... മുട്ടന്‍ കലിപ്പാവും.........

കള്ളുകുടിച്ച് വണ്ടി ഓടിച്ച് അവസാനം ബ്രെത്ത്അനലൈസറില്‍ ഉമ്മകൊടുത്തിട്ടും, രക്ഷപ്പെടാന്‍ എന്തെങ്കിലും മാര്‍ഗ്ഗമുണ്ടോ???
ഉണ്ടോ???
എനിക്കത് അറിയണം...അറിഞ്ഞേപറ്റൂ....

നേരെ ഗൂഗിളില്‍ ടൈപ്പ് ചെയ്തു...

"ഹൗ കാന്‍ ഐ രക്ഷപെട് ഓഫ് കള്ള് ആന്‍റ് ബ്രെത്ത്അനലൈസര്‍ അണ്ടര്‍ സെക്രട്ടറി ഒഫ് ഇന്ത്യ പ്രൈവറ്റ് ലിമിറ്റഡ്...."

ഫാഗ്യം!! കുറേ റിസല്‍ട്ട് ലിസ്റ്റുചെയ്യുന്നുണ്ട്

പക്ഷെ അതു മനസിലാക്കണമെങ്കി ബ്രെത്ത് അനലൈസറിന്‍റെ പ്രവര്‍ത്തനമെങ്ങനെന്ന് മനസിലാക്കണമെന്ന്...ഹും..

ഓക്കേ..എന്നാപ്പിന്നെ ലത് മനസിലാക്കിയിട്ട് തന്നെകാര്യം...

പ്രധാനമായും മൂന്നുതരം ബ്രെത്ത് ടെസ്റ്റിംഗ് ഉപകരണങ്ങളാണ് ഉള്ളത്...

ഒന്നാമത്തെ സാധനത്തിന്‍റെ പേര്

ബ്രെത്തലൈസര്‍(Breathalyzer)

ഇതില് ഒരു ട്യൂബില്‍ സല്‍ഫ്യൂറിക് ആസിഡ്(sulfuric acid), പൊട്ടാസ്യം ഡൈക്രോമേറ്റ്( potassium dichromate), സില്‍വര്‍ നൈട്രേറ്റ്(silver nitrate), വെള്ളം എന്നിവയുടെ ഒരു ലായനി ഉണ്ടാവും.

കള്ളുകുടിച്ചിട്ടോണ്ടോന്ന് അറിയാന്‍ വേണ്ടി, ഈ ട്യൂബിലെ ലായനിയിലേക്ക് ഊതാന്‍ പറയും...ശ്വാസത്തിലൂടെ പുറത്തുവരുന്ന ആല്‍ക്കഹോള്‍ ഈ മിശ്രിതത്തിന്‍റെ ഓറഞ്ച് നിറത്തിനു കാരണക്കാരനായ ഡൈക്രോമേറ്റ് അയോണിനെ,Cr(VI) പച്ചനിറക്കാരനായ ക്രോമിയം അയോണ്‍,Cr(III) ആക്കിമാറ്റും. അതായത് കള്ളുകുടിച്ചിട്ടുണ്ടെങ്കി ഓറഞ്ച് നിറത്തിലുള്ള ലായനി ഇപ്പോ പച്ച നിറമായിട്ടുണ്ടാകും..ഞാനിപ്പോ

ഊതി, കളറുമാറ്റിയ ആ ലായനിയും ആ ട്യൂബിലു നടന്ന രാസപ്രവര്‍ത്തനവും താഴെക്കണ്ടോളൂ....

കുടിച്ചിട്ടുള്ള കള്ളിന്‍റെ അളവിനനുസരിച്ച് നിറത്തിന്‍റെ തീവ്രതയും കിട്ടുന്ന ഇടിയുടെ എണ്ണവും വ്യത്യാസപ്പെടും..

ഇവിടെ സില്‍വര്‍ നൈട്രേറ്റ് ഉല്‍പ്രേരകമായാണ് ഉപയോഗിക്കുന്നത്.. ഉല്‍പ്രേരകമെന്നാല്‍ രാസപ്രവര്‍ത്തനത്തിന്‍റെ വേഗത കൂട്ടാനോ കുറയ്ക്കാനോ ഉപയോഗിക്കുന്ന കിടുപിടികളാണെന്ന് എട്ടാം ക്ലാസില്‍ വച്ച് ആനിടീച്ചറു പഠിപ്പിച്ചത് ഓര്‍മ്മവന്നു... (ഹൊ എന്‍റെയൊരു ഓര്‍മ്മശക്തി...ന്നെ സമ്മതിക്കണം)

രണ്ടാമത്തേത് -ഇന്‍‍റ്റോക്സിലൈസര്‍(Intoxilyzer):
സ്പെക്ട്രോസ്കോപ്പി എന്ന സങ്കേതമാണ് ഇതിന്‍റെ അടിസ്ഥാനം. ആല്‍ക്കഹോള്‍ സാംപിളിലൂടെ (ഊതി വിടുന്നതിലുള്ളത്) ഇന്‍ഫ്രാറെഡ് വികിരണങ്ങളെ കടന്നുപോകാന്‍ അനുവദിക്കുകയും, ആല്‍ക്കഹോളിന്‍റെ ഘടനാപരമായ പ്രത്യേകതകള്‍ കൊണ്ട് അത് ചില പ്രത്യേക തരംഗദൈര്‍ഘ്യമുള്ള ഇന്‍ഫ്രാറെഡ് വികിരണങ്ങളെ ആഗിരണം ചെയ്യുകയും ചെയ്യും. ഈ പ്രക്രിയ ഒരു മൈക്രോപ്രോസസ്സര്‍ ഉപയോഗിച്ച് വിശകലനം ചെയ്താണ് കാര്യങ്ങളു മനസിലാക്കുന്നത്.

കുടിച്ചിട്ടുള്ളതിന്‍റെ ബ്രാന്‍ഡും ആരുടെ കൂടെയിരുന്നു കുടിച്ചു എന്നൊന്നും മനസിലാക്കാന്‍ സാധിച്ചില്ലെങ്കിലും വളരെ കൃത്യമായി ആല്‍ക്കഹോളിന്‍റെ സാന്നിധ്യം ഇതുകൊണ്ട് അറിയാന്‍ കഴിയുമെന്നുള്ളത് ഇന്‍റോക്സിലൈസറിന്‍റെ സവിശേഷതയാണ്. ഇത് വലിയ ഉപകരണമായതുകൊണ്ട് പോലീസുകാര് കൊണ്ടു നടക്കില്ല എന്നൊരു സമാധാനമുണ്ട്

മൂന്നാമത്തേത്..

ആല്‍ക്കോസെന്‍സര്‍(Alcosensor)

തള്ളേ...ഇതാണ് നമ്മ പോലിസുകാരുടെ കയ്യിലിരിക്കുന്നത്.

ഫ്യുവല്‍ സെല്ലിന്‍റെ തത്വത്തെ അടിസ്ഥാനമാക്കിയാണ് ഇത് പ്രവര്‍ത്തിക്കുന്നത്.

ഫ്യുവല്‍ സെല്ല് എന്ന് പറഞ്ഞാല്‍ ഹൈഡ്രജന്‍, ആല്‍ക്കഹോള്‍ പോലെയുള്ള ഇന്ധനങ്ങളെ വൈദ്യുതിയാക്കി മാറ്റുന്ന ഉപകരണമാണെന്നാ ലൈന്‍മാന്‍ ശിവന്‍കുട്ടിചേട്ടന്‍ പറഞ്ഞുതന്നിട്ടുള്ളത്...

ഇതിന്‍റെ പ്രവര്‍ത്തനമെന്താന്ന് ചോദിച്ചാല്‍- ഊതിവിടുന്ന ആല്‍ക്കഹോളിനെ ഒരു പ്ലാറ്റിനം കമ്പി (ആനോഡ്) ഓക്സീകരിക്കും. അപ്പോ എഥനോയിക് ആസിഡും, ഹൈഡ്രജന്‍ അയോണുകളും ഇലക്ട്രോണുകളും ഉണ്ടാകും. ഈ ഇലക്ട്രോണുകള്‍ അടുത്ത പ്ലാറ്റിനം കമ്പിയിലേക്ക്(കാഥോഡ്) ഒഴുകാനും തുടങ്ങും...കൂടുതല്‍ കള്ളുകുടിച്ചിട്ടുണ്ടെങ്കി കൂടുതല്‍ ഇലക്ട്രോണുകള്‍ ഒഴുകും.. ...ഇല്ക്ട്രോണിന്‍റെ ഒഴുക്കാണല്ലോ വൈദ്യുതി... അങ്ങനെയുണ്ടാകുന്ന വൈദ്യുതിയുടെ അളവ് നോക്കിയാല്‍ കുടിച്ച കള്ളിന്‍റെ അളവ്അഥവാ Blood Alcohol Content (BAC) മനസിലാക്കാന്‍ കഴിയുമെന്ന്......പുരിഞ്ചിതാ..?

അപ്പോ പറഞ്ഞുവന്നത് എങ്ങനെ ബ്രെത്ത്അനലൈസറില്‍ നിന്ന് രക്ഷപെടാമെന്ന്...... അത് ഈസിയല്ലേ..
ദാ ഈ ലിങ്കിലുഞെക്കൂ. അതില് പറഞ്ഞിരിക്കുന്ന കാര്യങ്ങളൊക്കെ മനസിലാക്കിയിട്ട് വണ്ടി സ്റ്റാര്‍ട്ടിയാ മതി...ഒരു പുല്ലന്‍റെ അനലൈസറിനേം പ്യാടിക്കണ്ട

പക്ഷേ...

പിടിക്കുന്നത് കേരളപോലിസാണെങ്കി ആ ലിങ്ക് വായിച്ചിട്ടും വല്യകാര്യമൊന്നുമില്ല കേട്ടോ...
രക്ഷപെടണമെന്നുണ്ടെങ്കി.....

ഇല്ല ഞാനതു പറയൂല്ല...പറഞ്ഞു തരൂല.....

വാല്‍ക്കഷ്ണം

100 mL രക്തത്തില് അനുവദനീയമായ മദ്യത്തിന്‍റെ പരമാവധിഅളവ് 30 mg ആണ്. ആദ്യമായിട്ട് പിടിക്കുവാണെങ്കി രണ്ടായിരം രൂപാ പിഴയോ ആറുമാസം തടവോ അല്ലെങ്കില്‍ രണ്ടുകൂടി ഒറ്റ പാക്കേജായോ ആണ് കിട്ടുന്നത്. കുറ്റം ആവര്‍ത്തിച്ചാല്‍ മൂവായിരം രൂപയോ മൂന്നുവര്‍ഷം തടവോ അല്ലെങ്കി രണ്ടുംകൂടിയോ....

പോലിസ് പിടിക്കുന്നതും പിഴകെട്ടുന്നതുമൊക്കെ ചീളുകേസാണണ്ണാ..അതിനൊക്കെ ഒരു സമാധാനമുണ്ട്.....
പക്ഷെ.. കള്ളുകുടിച്ച് വണ്ടിയോടിച്ചിട്ട് വഴിയേപോകുന്നവനെ ഇടിച്ചിട്ടാ..ഏവന്‍റെയെങ്കിലും വണ്ടിയിലൊന്ന് ചുമ്മാ തട്ടിയാ.....
അയ്യൊ..
നാട്ടുകാര് ഇടിച്ച് നമ്മുടെ കൂമ്പ്കലക്കും....

അനുഭവമുള്ളതുകൊണ്ട് പറയുവാ......

പണി വരുന്ന ഓരോ വഴികളേ...

2010-07-08T23:47:00.010+05:30

പണ്ടൊക്കെ നെറ്റ് കഫെ നടത്തുന്നവന്‍മാര് കീ ലോഗര്‍ സോഫ്റ്റ്‍വെയറുകളിട്ടായിരുന്നു നാട്ടുകാരുടെ പാസ്‍വേഡ് അടിച്ചുമാറ്റിക്കോണ്ടിരുന്നത്..

ഇപ്പ അടുത്ത ഉഡായിപ്പുമായി ഇറങ്ങിയിരിക്കുന്നു...

കീ സ്ട്രോക്ക് ലോഗര്‍...
ഇതൊരു എക്സ്റ്റേണല്‍ ഡിവൈസാണ്. ഇതിന്‍റെ സാന്നിധ്യം സോഫ്റ്റ്‍വേറുകളൊന്നും ഉപയോഗിച്ച് കണ്ടുപിടിക്കാനാവില്ല... സാധാരണ ഇത് കീബോര്‍ഡ് കേബിളിന്‍റെ അറ്റത്ത് പിടിപ്പിച്ച് അത് PS/2 പോര്‍ട്ടിലേക്ക് കണക്ട് ചെയ്യും. വയര്‍ലെസ് കീ ബോര്‍ഡിനൊപ്പവും ഇത് പുട്ടും പഴവും പോലെ വര്‍ക്കുചെയ്യും.

കന്യകാത്വം നഷ്ടപ്പെട്ടിട്ടില്ലെന്ന് നമ്മളു വിചാരിക്കുന്ന തങ്കക്കുടങ്ങളായ പാസ്‍വേഡുകളേം, ചാറ്റ് ഡീറ്റയില്‍സ്, വെബ് അഡ്രസുകള്‍, സെര്‍ച്ച് ആക്ടിവിറ്റികള്‍ തുടങ്ങിയ കീ സ്ട്രോക്കുകളേം ഇവന്‍ സ്റ്റോര്‍ ചെയ്തു വയ്ക്കും. സ്റ്റോര്‍ ചെയ്തു വക്കുന്ന ഡാറ്റ മറ്റൊരു കമ്പ്യൂട്ടറില്‍ നിന്ന് തിരിച്ചെടുക്കാനും സാധിക്കും...

കീസ്ട്രോക്ക് ലോഗറുകളുടെ ഇന്‍സ്റ്റലേഷന് നിമിഷങ്ങള്‍ മാത്രം മതി. അതായത് നെറ്റകഫെകളിലും എയര്‍പോര്ട്ട് തുടങ്ങിയ പൊതു സ്ഥലങ്ങളിലും, എപ്പോ വേണമെങ്കിലും ആര്‍ക്കും ഇത് പിടിപ്പിക്കേം ഊരിമാറ്റുകേം ചെയ്യാം എന്ന്....

അതുകൊണ്ട് പൊന്നണ്ണമ്മാരേ ഓസിനു ബ്രൗസു ചെയ്യാന്‍ ചാന്‍സുകിട്ടുമ്പോ തീരെ പരിചയം തോന്നാത്ത എന്തെങ്കിലും സാധനങ്ങള് കമ്പ്യൂട്ടറില്‍ പിടിപ്പിച്ചിട്ടുണ്ടോന്ന് ഒന്നു നോക്കിക്കോണം...

പാസ്‍വേഡുകളാ...ഒരിക്ക കൈവിട്ടാ പിന്നെ കിട്ടൂല്ലേ...... പറഞ്ഞേക്കാം.......
(കേരളത്തിലെ ഇന്‍റര്‍നെറ്റ് കഫെകളില്‍ കീസ്ട്രോക്ക് ലോഗറിന്‍റെ ഉപയോഗം അടുത്തകാലത്ത് വര്‍ദ്ധിച്ചിരിക്കുന്നു.. എന്ന് സ്ഥിരീകരിക്കാത്ത ഒരു വാര്‍ത്തയുണ്ട്)

തീക്കുറുക്കനെ പറപ്പിച്ചോ???

2010-07-07T14:37:00.008+05:30

ക്രോമും സഫാരിയുമൊക്കെയിട്ട് അര്‍മാദിക്കുമെങ്കിലും ബ്രൗസറെന്ന് പറഞ്ഞാ ഫയര്‍ഫോക്സു തന്നെ എനിക്കിപ്പഴും...

എന്നാലും എന്‍റെ ഫയര്‍ഫോക്സിനെന്തോ ഒരൂ സൈഡ് വലിവ്.. ഒരു പിക്കപ്പില്ലാത്ത ഫീലിംഗ്... ഇതങ്ങനെ വിട്ടാ പറ്റൂലല്ലോ....

സായിപ്പന്‍മാര് ഫയര്‍ഫോക്സ് റ്റ്വീക്ക്സൊക്കെ കണ്ടുപിടിച്ചുവെച്ചിരിക്കുന്നത് പിന്നെ എന്നാ ഡാഷിനാ???

ഇതാ വാസൂട്ടന്‍, ഒരു സായിപ്പണ്ണന്‍ പറയുന്നപോലെ ചെയ്യാന്‍ പോണൂ....
ഖാവിലമ്മേ ഖാത്തോളണേ.....

ആദ്യം ഫയര്‍ഫോക്സിന്‍റെ അഡ്രസ് ബാറില്‍ about:config എന്നടിച്ച് എന്‍ററു ചെയ്യണമെന്ന്...ആദ്യമായിട്ട് സായിപ്പ് ഒരു കാര്യം പറയുന്നതല്ലിയോ ചെയ്തേക്കാം..ശ്ശൊ.. അപ്പ ഇങ്ങനെ വന്നു...

ഞാന്‍ പേടിക്കുമോ.. സായിപ്പല്ലേ കൂടെയുള്ളത്... "i will be careful. i will promise" ലതില്‍ പിടിച്ച് ഞെക്കി...അപ്പ അടുത്ത സ്ക്രീന്‍...ഉം..

ഇനി network.http.pipeliningഎന്ന് filter ല്‍ അടിച്ചിടണം.. പക്ഷേ എനിക്ക് സൗകര്യമില്ല.. ഞാന്‍ കോപ്പി പേസ്റ്റേ ചെയ്യൂ.. ന്തോ ചെയ്യും...

താഴെ ആ കുന്തം വച്ചു കുത്തിയിരിക്കുന്നതില് ഡബിള്‍ ക്ലിക്കുചെയ്താ അതിന്‍റെ വാല്യൂ true ആകുമെന്ന്..ആഹാ എന്നാ അതൊന്നു കാണണമല്ലോ

ഓഹോ അപ്പ ഇതുപോലെയാണ് വാല്യൂ മാറ്റുന്നത്...

ങും...ഇപ്പം ടെക്നിക് പിടികിട്ടി

network.http.proxy.pipelining

network.protocol-handler.external.ms-help

content.notify.ontimer

content.interrupt.parsing

plugin.expose_full_path

browser.tabs.showSingleWindowModePrefs

എല്ലാം ഇതുപോലെ കോപ്പി പേസ്റ്റ് ചെയ്തിട്ട് ഡബിളടിച്ച് വാല്യൂ true ആക്കി

ഇതില് ചെല സാധനങ്ങള് ടൈപ്പ് ചെയ്തിട്ടാ പ്രിഫറന്‍സ് നേമിന്‍റെ താഴെയായിട്ട് ലിസ്റ്റ് ചെയ്യില്ലാത്രേ....
അപ്പോ അങ്ങനൊരു സാധനം നമ്മള് ഒണ്ടാക്കികൊടുക്കണമെന്ന്.
..ഹും.... ഇതിലും വല്യ അലമ്പുകളൊക്കെ എത്ര ഒണ്ടാക്കിയിരിക്കുന്നു....
അപ്പോഴാ ഈ ചീളുകേസ്.....

ങേ.... അതെങ്ങനാ ഒണ്ടാക്കുന്നതെന്നോ....
ശ്ശെ...ദത് വെറും സിംപിളല്ലേ.....

ആദ്യം ആ സ്ക്രീനിലെവെടെങ്കിലും റൈറ്റ് ക്ലിക്കു ചെയ്യണം...ന്നിട്ട്

New>Boolean കണ്ടാ..അതിലു ഞെക്കി അടുത്ത വിന്‍റോയില്‍ ഇല്ലാത്തതിന്‍റെ പേര് കോപ്പി പേസ്റ്റ് ചെയ്തു കൊടുക്കാം....

ഇനി ഓക്കേന്ന് അടിച്ച് അടുത്തുവരുന്ന വിന്‍റോയില് true എന്ന് സിലക്ട് ചെയ്യണം.. അത്രേയുള്ളൂ..

എന്നട്ട് ആക്കേ ഗൊടുത്താമതി...

അങ്ങനെ ഇല്ലാത്തതൊക്കെ ഒണ്ടാക്കി ട്രൂവാന്ന് പറഞ്ഞടിച്ചിടുകേം ചെയ്തു...

ഇനി ട്രൂ ഓര്‍ ഫോള്‍സ് പരിപാടികള്‍സ് വിട്ടിട്ട്

കുറച്ച് അരിത്തമെറ്റിക് സെറ്റപ്പുകളിലേക്ക് കേറാം...

ആദ്യം network.http.pipelining.maxrequests ലവിടെ (ഫില്‍റ്ററില്‍) കോപ്പി പേസ്റ്റു ചെയ്യാം...എന്നിട്ട് ഡബിള്‍ ക്ലിക്കിയാല് ഒരു അക്കം കൊടുക്കാന്‍ പറയും..

ഞാന്‍ 2 എന്നടിക്കും.. ഹൂം...

ഇനി സ്ക്രീനില്‍ മുമ്പ് ചെയ്തപോലെ എവിടെങ്കിലും....റൈറ്റ് ക്ലിക്ക് താഴെ പോട്ടത്തിലു കാണുന്ന പോലെ Integer ല്‍ ഞെക്കി

(ഏതിന്‍റെയെങ്കിലും മണ്ടക്കു വെച്ചു ഞെക്കിയാലും ഒരു ചുക്കുമില്ല....റൈറ്റ് ക്ലിക്കണം ത്ര മാത്രം..)

ഹമ്മേ അവടെ യെന്തരോ എന്‍ററു ചെയ്യണമെന്ന്... എന്തായാലും ഇത്രേം ആയി എന്നാപ്പിന്നെ nglayout.initialpaint.delay കൂടി കോപ്പി പേസ്റ്റ് ചെയ്ത് അവിടിടാം..

അവിടുന്ന് ഓക്കേന്ന് പറഞ്ഞ് അടുത്ത വിന്‍റോയില്‍ 0 എന്നൂടെ ടൈപ്പി

ആഹാ..അപ്പ അങ്ങനാണ് പുതിയ സാധനങ്ങള് ഒണ്ടാക്കിയിട്ട് വാല്യു കൊടുക്കുന്നത്... ഉം ...ഇനി

content.notify.backoffcount എന്ന സാധനം ഒണ്ടാക്കി 5 എന്നടിച്ചു... അടുത്ത വിന്‍റോയില്‍

നെക്സ്റ്റെന്നുപറഞ്ഞാല്‍ ui.submenuDelay എന്ന സാധനം കൂടി ഒണ്ടാക്കി അടുത്ത വിന്‍റോയില്‍ 0 എന്നടിച്ചുകൊടുക്കണമെന്ന്...

തീരണല്ലില്ലാ.. ഇനി browser.cache.memory.capacity ഉണ്ടാക്കി അതില് 65536 എന്നടിച്ചു..എന്തെങ്കിലും കൊഴപ്പമാവുമോ ന്തോ...

ങും... അടുത്തത്

network.http.max-persistent-connections-per-server വാല്യൂ 8

അടുത്തതായിട്ട്...

network.http.max-persistent-connections-per-proxy വാല്യൂ 16 ..

ഇറങ്ങിപ്പോയി ഇനി ചെയ്യാതിരുന്നാലോ.....

കുരുപൊട്ടിക്കാനായിട്ട് ഓരോന്നു എഴുതി വച്ചോളും...

network.http.max-connections-per-server വാല്യൂ 16

മ..... വായില് തെറിയാ വരുന്നത്.

content.switch.threshold അതും കൂടി പണ്ടാരമടക്കി 750000 ന്ന് വാല്യൂം കൊടുത്തു

ശ്ശെടാ ഇത് വല്യ ശല്യമായല്ലാ

content.notify.interval വാല്യൂ 750000 അടിച്ചേ....

ഞാനിതെറിഞ്ഞുപൊട്ടിക്കും...

content.max.tokenizing.time വാല്യൂ 2250000

ഹോ... കട്ടക്കലിപ്പായി....

ഇനി റീസ്റ്റാര്‍ട്ട് ചെയ്തു നോക്കട്ട്...സ്പീഡ് കൂടിയില്ലെങ്കില്‍ ഇതൊക്കെ എഴുതിപ്പിടിപ്പിച്ച്, എന്നെപ്പറ്റിച്ച ആ വെള്ളത്തൊലിയന്‍ സായിപ്പിന്‍റെ സൈറ്റില് കേറി അവനെ തള്ളക്കു വിളിച്ചട്ട് തന്നെ ബാക്കിക്കാര്യം.....

ഇനി എന്നെയാരും തള്ളക്കുവിളിക്കാതിരിക്കാന്‍ വേണ്ടി.......

ടൈപ്പു ചെയ്ത എന്‍ട്രി കലിപ്പായി ഫീല് ചെയ്താല്‍, അത് കണ്ടുപിടിച്ച് റൈറ്റ് ക്ലിക്കി reset അടിച്ച്

ഫയര്‍ഫോക്സ് റീസ്റ്റാര്‍ട്ടിയാ മതി

അല്ലെങ്കില് C:\Users\username\AppData\Roaming\Mozilla\Firefox\Profiles/xxxxxxxx.default ഇവിടെച്ചെന്ന് prefs.js ഈ ഫയല് നോട്ട്പാഡില്‍ തൊറന്ന് വേണ്ടാന്നുതോന്നുന്നത് ഡിലീറ്റിയാലും മതി കേട്ടോ...

ഓരോന്നും എന്താണെന്നും എന്തിനാ ഇത് ചെയ്യുന്നേന്നും അറിയണമെങ്കി അതാതിന്‍റെ മേലുള്ള ലിങ്കത്തിലു പിടിച്ചു ഞെക്കിക്കോ..

network.http.pipelining

network.http.proxy.pipelining

content.notify.ontimer

content.interrupt.parsing

content.notify.backoffcount

network.http.pipelining.maxrequests

plugin.expose_full_path

content.max.tokenizing.time

content.notify.interval

content.switch.threshold

network.http.max-connections-per-server

ഇനീം എന്തിനാ ഇങ്ങനെ കണ്ണുതെള്ളി നോക്കുന്നേ..?

എന്താ.. എല്ലാത്തിന്‍റേം ലിങ്കില്ലന്നോ...

ങാ.. ഇല്ല...ഇപ്പ തല്‍ക്കാലം ഇത്രേം മതീ..

(താഴെ വീണുകിടക്കുന്ന കമന്‍റുകളൂടെ വായിച്ചേച്ച് വേണം ഇതൊക്കെ ചെയ്യാന്‍... പറഞ്ഞില്ലെന്നു വേണ്ട)

റിമോട്ട് ഹസ്ബന്‍റന്‍സ്

2010-07-02T11:01:00.003+05:30

ഹൊ...കട്ടപ്പണിയെന്നു പറഞ്ഞാ കട്ടപ്പണി.....
ഇങ്ങനെ എയറില്‍ നിന്ന് പണിചെയ്യുമ്പോഴാ മലയാളക്കരയിലെ സാറന്‍മാരോട് അസൂയ തോന്നിപ്പോവുന്നത്..

ആക്ഷന്‍പ്ലാന്‍, ഐറ്റം അനാലിസിസ്, ഡയഗ്നോസ്റ്റിക് ടെസ്റ്റ്, സ്കീം ഒഫ് വര്‍ക്ക്..

ന്‍റെമ്മേ... ഇതൊക്കെ ഈ ആഴ്ച തന്നെ ചെയ്തുതീര്‍ക്കണമെന്നാ തല പറ‍ഞ്ഞിരിക്കുന്നത്.....

ഇങ്ങനൊക്കെയുള്ള കാര്യങ്ങളു ബി.എഡിന്‍റെ സിലബസില്‍ ഉണ്ടായിരുന്നാ? ഉണ്ടെന്നെല്ലാരും പറയുന്നു...പക്ഷെങ്കില് ഞാന്‍ വിശ്വസിക്കൂല...

ഫസ്റ്റ് ടേം റിസല്‍ട്ട് അനാലിസിസ് പ്രസന്‍റേഷന്‍ നാളെ ചെയ്യണം.. അതുകഴിയുമ്പോ എല്ലാരും കൂടി എന്നെ വലിച്ചുകീറി ഭിത്തിയിലൊട്ടിക്കും...അതോര്‍ക്കുമ്പോഴാ........

ഹമ്മേ.....!! നെഞ്ചിന്‍റെ ഇടതുവശത്തായി ഒരു പെരുപ്പ്......

ങേ... എന്താ ഡോക്ടറെ കാണണോയെന്നോ?
ഏയ്.... അത് ഫോണ്‍ വൈബ്രേഷനില്‍ കിടന്നടിക്കുന്നതാ...

.. വൈഫിയുടെ മിസ്ഡ് കാള്‍..
ലവളു ഓണ്‍ലൈന്‍ വരുമ്പോ മിസ്ഡ് കാളുതരും അഞ്ചുമിനിറ്റിനുള്ളില്‍ ജിടോക്കിലോ സ്കൈപിലോ അവൈലബ്ള്‍ ആയില്ലെങ്കില്‍ എന്‍റെ കട്ടേം പടവും മടങ്ങും..അല്ലൈങ്കി മടക്കും...

ഈസ്വരാ ഫവ്വാനേ......കണക്ടാവുന്നുണ്ട്...ല്ലാം ആക്കെ... പക്ഷെ ഇതെന്തര് ഒന്നും കേള്‍ക്കുന്നില്ലല്ലോ....

ഇന്ന് ഫോണ്‍ചെയ്ത് ന്‍റെ ട്രൗസറുകീറും...
എന്തും വരട്ട് വിളിച്ചേക്കാം... അല്ലെങ്കി ദതുമതി ലവക്ക് ഒരാഴ്ചത്തേക്ക് മിണ്ടാതിരിക്കാന്‍....

"ഹലോ മുത്തേ......"
"ങും..."
"എന്നാപറ്റി കമ്പ്യൂട്ടറിന്? ഒന്നും കേക്കണില്ലല്ലോ"
"അറിയത്തില്ല.. പാട്ടുവച്ചിട്ടും കേക്കുന്നില്ല കേട്ടാ"
"ആണോ.. എങ്കില്‍ സൗണ്ട് മ്യൂട്ടായിരിക്കുന്നതായിരിക്കും..."
"യെന്തര്?"
"നീ കണ്‍ട്രോള്‍ പാനലില്‍...അല്ലെങ്കില്‍ വേണ്ട ടാസ്ക് ബാറില്‍ പോയി.....സൗണ്ട് ഐക്കണില്‍ ക്ലിക്കി മ്യൂട്ടായിക്കിടക്കുന്നത് ചേഞ്ച് ചെയ്യ്"
"ങേ...യെങ്ങനെ..?"

ടിംഗ്...

ഞാന്‍ ഫോണ്‍ വെച്ചു...ഹല്ല..പിന്നെ...
ലവളെ അതു ശരിയാക്കാന്‍ പഠിപ്പിക്കണമെങ്കില്‍ ഇതുവരെ ഞാന്‍ പഠിച്ച ടീച്ചിംഗ് സ്റ്റ്രാറ്റജികളൊന്നും പോരാ...

സാരമില്ല.. ഇതു പോലെയുള്ള ക്രിറ്റിക്കല്‍ മൊമന്‍റ്സിനെ ഹാന്‍ഡിലു ചെയ്യാന്‍ വേണ്ടി എന്തായാലും ഞാന്‍ മറ്റേക്കാര്യം അവിടെ ചെയ്തു വച്ചിട്ടുണ്ടല്ലാ......

ഫ്ലാഷ്ബാക്ക്.....
ഫ്ലാഷ്ബാക്കായതുകൊണ്ട്.സ്ക്രീന്‍ ഷോട്ടുകള്‍ ബ്ലാക്ക് ആന്‍റ് വൈറ്റില്‍.....ദതാണല്ലോ ലതിന്‍റെയൊരു ലിത്

-------------------------------------------------------------------------------------------------------------

2009 ഡിസംബര്‍ 23

പത്തനാപുരം
10.10 എ.എം
-------------------------------------------------------------------------------------------------------------

നേരെ ദിവിടെപ്പോയി റിമോട്ട് അസിസ്റ്റന്‍സ് സോഫ്റ്റ്‍വെയര്‍ അങ്ങു ഡൗണ്‍ലോഡി...ഇനി ഇന്‍സ്റ്റാളണം....

അങ്ങനെ ആ പരിപാടി തീര്‍ന്നു.....

-------------------------------------------------------------------------------------------------------------

ദെന്‍.. വെല്‍ക്കം ബാക്ക്....

ഇനി ഇവിടെ ഞെക്കിയാല്‍ ലോഗിന്‍ പേജിലെത്താം..

ഇമെയില്‍ ഐഡിയും പാസ്‍വേഡും അടിച്ചപ്പോ ദിങ്ങനെ വന്നു

റിമോട്ട് കണ്ട്രോളില്‍ ഞെക്കിയേക്കാം...

തള്ളേ...കൊള്ളാം വീട്ടിലെ സിസ്റ്റത്തിന്‍റെ യൂസര്‍നേമും പാസ്‍വേഡും അടിക്കണമെന്ന്.... ഓക്കെ അടിച്ച് അപ്പോ ആ സിസ്റ്റത്തിലെ ഡെസ്ക്റ്റോപ്പ് ലോഗ് മി ഇന്‍ ന്‍റെ സൈറ്റില്‍ ഇങ്ങനെ കണ്ടു....

ഇനി ഇവിടിരുന്ന് എന്‍റെ വീട്ടിലെ സിസ്റ്റം ആക്സസ് ചെയ്യാന്‍ പറ്റും.....
കാര്യങ്ങള് ഞാന്‍ വിചാരിച്ചപോലെ ... സൗണ്ട് മ്യൂട്ടായിക്കിടന്നത് തന്നെ... അത് ശരിയാക്കി...

വീണ്ടും ജിടോക്കില്‍...

"മുത്തേ ഇപ്പോ കേള്‍ക്കാമോ?"
"വ്വോ.. കേക്കാം...കേക്കാം...."
"പിന്നെ എന്താ വിശേഷം?"
"നാളെ അമ്മിണിച്ചിറ്റയുടെ മോള് സുധക്കുട്ടിയുടെ കല്യാണമാ..."
"അതിന്...?"
"എനിക്കൊരു പുതിയ സാരി വേടിക്കണം. കേക്കുന്നുണ്ടോ??"
"........................................".
"........................................".
"........................................".

എന്താന്നറിയില്ല... എന്‍റെ സിസ്റ്റത്തിലെ സൗണ്ട് ഇപ്പോ മ്യൂട്ടായി..
ഇനി അത് സുധക്കുട്ടിയുടെ കല്യാണം കഴിഞ്ഞിട്ടേ ശരിയാവൂ...

വാല്‍ക്കഷ്ണം

ലോഗ് മി ഇന്‍ ഉപയോഗിക്കുമ്പോള്‍ ഏത് കമ്പ്യൂട്ടറിനെയാണ് റിമോട്ട് ആക്സസ് ചെയ്യേണ്ടത് അതില്‍ മാത്രം സോഫ്റ്റ്‍വെയര്‍ ഇന്‍സ്റ്റാള്‍ ചെയ്താല്‍ മതി. അവരുടെ സെക്യൂര്‍(?) സൈറ്റില്‍ നിന്നും നമ്മുടെ ഇമെയില്‍ ഐഡിയും പാസ്‍വേഡും കൊടുത്ത് റിമോട്ട് അസിസ്റ്റന്‍സ് ചെയ്യാനാകും. റിമോട്ട് ആക്സസ് ചെയ്യേണ്ട കമ്പ്യൂട്ടറില്‍ ആളുവേണമെന്ന് നിര്‍ബന്ധമില്ല.

കുറച്ചുകൂടി സുരക്ഷിതമായി(?) ഉപയോഗിക്കാവുന്ന ഒന്നാണ് ടീം വ്യൂവര്‍. ഇത് ഉപയോഗിക്കണമെങ്കില്‍ രണ്ടു സിസ്റ്റങ്ങളിലും സോഫ്റ്റ്‍വെയര്‍ ഇന്‍സ്റ്റാള്‍ ചെയ്യേണ്ടി വരും. മാത്രമല്ല ഏത് സിസ്റ്റമാണോ ഉപയോഗിക്കണ്ടത് അതിലെ സോഫ്റ്റ്‍വെയര്‍ തരുന്ന ഐഡിയും പാസ്‍വേഡും ഉപയോഗിച്ചാലേ അതിനുള്ളില്‍ കടക്കാനാവുകയുള്ളു. ഈ പാസ്‍വേഡ് ഒരു പ്രത്യേക സെഷനില്‍ മാത്രമേ വര്‍ക്കാകുകയുള്ളു. അതായത് മറ്റൊരിക്കല്‍ റിമോട്ട് ആക്സസ് ചെയ്യണമെങ്കില്‍ വീണ്ടും പാസ്‍വേഡ് ചോദിക്കേണ്ടിവരും. റിമോട്ട് ആക്സസ് ചെയ്യുന്ന കമ്പ്യൂട്ടറില്‍ ആളു വേണമെന്നു ചുരുക്കം.

റിമോട്ട് അസിസ്റ്റന്‍സിന് ഉപയോഗിക്കാവുന്ന മറ്റു ചില ലിങ്കുകള്‍ കൂടി...

ഒരു ഹാക്കറുമായി നടത്തിയ അഭിമുഖത്തില്‍ നിന്നും....

2010-06-27T13:39:00.009+05:30

ഹാക്കര്‍..ഹാക്കര്‍ എന്നു പറഞ്ഞുകേട്ടിട്ടേയുള്ളു.. പച്ച ജീവനോടെ ഇതുവരെ ഒരു ഹാക്കറേം കണ്ടിട്ടില്ല...

ഏതെങ്കിലും ഒരു ഹാക്കറുടെ അഡ്രസ് തരാമോന്ന് പോസ്റ്റ്മാന്‍ രാഘവവേട്ടനോട് ചോദിച്ചപ്പോ ന്‍റെ നാട്ടില് തന്നുള്ള സോമന്‍ ഹാക്കറുടെ അഡ്രസും ഫോണ്‍ നമ്പരും തന്നു....

ഹൊ... രക്ഷപെട്ടു... ഒരു ലോക്കല്‍ ഹാക്കറെത്തന്നെ കിട്ടിയത് ന്‍റെ ഫാഗ്യം...

ഉടനെ അടുത്ത ബൂത്തില്‍ കേറി സോമനെ വിളിച്ചു... ഞാന്‍ വാസുവിന്‍റെ വിലാപങ്ങള്‍ എഴുതുന്ന വാസുവാണെന്ന് പറഞ്ഞപ്പോ പുള്ളിക്ക് ഫയങ്കര സന്തോഷം... എന്‍റെ ഓട്ടോഗ്രാഫ് വല്ലോം വേണമെങ്കില്‍ ഇരുനൂറ് പേജിന്‍റെ വരയിട്ട ബുക്ക് വാങ്ങിച്ചു വച്ചോളൂ എന്ന് പറയാനും ഞാന്‍ മറന്നില്ല....

ഇപ്പോത്തിരക്കിലാണ് വൈകിട്ട് ആറുമണിക്ക് പാലാഴി ബാറില്‍ വച്ചുകാണാമെന്ന് അവസാനം ധാരണയായി..

കൃത്യം ആറുമണിക്കുതന്നെ ഞാന്‍ പാലാഴിയിലെത്തി. വന്നുകേറിയുടനേ സ്റ്റാന്‍‍‍ഡിംഗില്‍ ഒരെണ്ണമങ്ങുകീറി....

ഏകദേശം ഒരു ആറ്... ആറേകാല്‍ ആയപ്പോ ... സോമന്‍ എത്തി.....

മുണ്ടും ഷര്‍ട്ടുമിട്ട ലളിത വേഷം.... നരനിലെ മോഹലാലിനെപ്പോലെ, വെള്ളക്കരയന്‍ നിക്കറ് പുറത്തുകാണുന്നരീതിയില്‍ മുണ്ട് മാടിക്കുത്തിയിട്ടുണ്ട്.....

കിരണ്‍ ടിവിയെലെ നാഷിന്‍റെ ആക്സന്‍റ് വരുത്തി ഞാന്‍ തുടങ്ങി...

"ഹല സോംസ്...ഐ ആം വാസ്... ഫ്രം വാസ്ന്‍റെ വിലാപ്ങ്‍ല്‍..."

"നമസ്കാരം വാസു... ഞാന്‍ താമസിച്ചോ....?"

"നോ നെവര്‍....അപ്പോ ന്താ പറയേണ്ടേ? ഞാന്‍ സീസറിന്‍റെ നാലെണ്ണം അടിച്ചു.."

ഒരു വെയിറ്റിനുവേണ്ടി അങ്ങനെ പറയേണ്ടി വന്നു

"എനിക്ക് ഓ.പി.ആര്‍ മതി..."

"എന്നാപ്പിന്നെ എനിക്കും അത് തന്നെ...."

ബെയററ് ചെക്കനെ വിളിച്ച് ഉടന്‍തന്നെ അര ലിറ്റര്‍ ഓ.പി.ആര്‍ പറഞ്ഞു...കൊറിക്കാന്‍ അവരുഫ്രീയായിട്ട് കീര്‍ത്തിചക്ര എന്ന് ഞങ്ങളു വിളിക്കുന്ന ഒരു സാധനം തരും... വേറെയെന്തിങ്കിലും വാങ്ങിക്കണമെന്ന് വച്ചാ... ലത് സോമന്‍ വാങ്ങിക്കുവാരിക്കും.......ഞാന്‍ മനക്കോട്ട കെട്ടി

"അപ്പോ സോമന്‍ ഹാക്കറേ.. ഞാന്‍ താങ്കളോട് കുറച്ച് കാര്യങ്ങളു ചോദിക്കണമെന്ന് വിചാരിക്കുന്നു...."

"എന്താണ്..ചോദിച്ചോളു.."

"ഈ സ്ക്രിപ്റ്റ് കിഡ്ഡി(script kiddie), ഹാക്കിംഗ് ഇവ തമ്മിലുള്ള വ്യത്യാസമെന്താണ്....?"

ഒരു തൊണ്ണുറ് വെള്ളം തൊടാതെ അടിച്ചുകൊണ്ട് സോമന്‍ സംസാരിച്ചു തുടങ്ങി...

"ശരിക്കും സ്ക്രിപ്റ്റ് കിഡ്ഡി എന്നുപറഞ്ഞാല്‍ ഏത് കൂതറക്കും ചെയ്യാം...ഒരു ടെക്നിക്കലായ അറിവും അതിന് ആവശ്യമില്ല....പക്ഷേ, വിദഗ്ദരായ ആളുകള്‍ക്കും മാത്രം ചെയ്യാന്‍ പറ്റുന്ന ഒരു കാര്യമാണ്ഹാക്കിംഗ്...."

"മനസിലായില്ല.. എന്നു വച്ചാല്.....??"

"വാസൂന് ഫിഷിംഗ് (phishing) എന്നുപറഞ്ഞാലെന്താന്ന് അറിയോ?"

"ഉം...വല്യ വിവരമില്ലാത്തവരുടെ പറ്റിച്ച് പാസ്‍വേഡൊക്കെ ചൂണ്ടുന്ന പരിപാടിയല്ലേ...? ഫേക്ക് വെബ് പേജൊക്കെയുണ്ടാക്കി..."

"യെസ് അത് തന്നെയാണ്.... ഫിഷിംഗ് വെറുമൊരു ഫ്രാഡ് ട്രിക്ക് മാത്രമാണ്..കമ്പ്യൂട്ടര്‍ ഓണാക്കാന്‍ അറിയാവുന്ന കൊച്ചുപിള്ളേര്‍ക്കുപോലും അത് ചെയ്യാന്‍ പറ്റും.....

പിന്നെ സ്ക്രിപ്റ്റ് കിഡ്ഡി എന്ന് പറയുന്ന സാധനം......

ദേ അടുത്ത തൊണ്ണൂറും വെള്ളം തൊടാതെ അടിക്കുന്നു... എനിക്കത് കണ്ടിട്ടു സഹിച്ചില്ല ഞാനും വിട്ടു ഒരു രണ്ട് അറുപത്... ഹല്ല പിന്നെ...

.....ഐ മീന്‍ സ്ക്രിപ്റ്റ് കിഡ്ഡിയില്‍...

ആണുങ്ങള്‍ ഒണ്ടാക്കിവച്ചിരിക്കുന്ന പ്രോഗ്രാമുകള്‍ ഉപയോഗിച്ചോ അല്ലെങ്കില്‍ ഇന്‍റര്‍നെറ്റില്‍ നിന്നും മറ്റും ലഭിക്കുന്ന വിവരങ്ങള്‍ ഉപയോഗിച്ചോ ആണ് സൈബര്‍ക്രൈമുകള്‍ ചെയ്യുന്നത്..."

"കീലോഗറുകളെപോലെയുള്ള പ്രോഗ്രാമുകള്‍ ല്ലേ?"

"അതേയതേ...കീലോഗറുകളുമാത്രമല്ല വേറെയും പ്രോഗ്രാമുകളും ടെക്നിക്കുകളുമൊക്കെ സെര്‍ച്ചിയാ കിട്ടും. ശരിക്കും ഈ സ്ക്രിപ്റ്റ് കിഡ്ഡി ചെയ്യുന്നവന്മാര് ജന്മനാ അല്‍പജ്ഞാനികളായിരിക്കും എന്നാണ് ആറ്റുകാല്‍ രാധാകൃഷ്ണന്‍ പോലും പറയുന്നത്...."

അല്‍പജ്ഞാനി എന്ന് പറഞ്ഞപ്പോ സോമന്‍ എന്നെ സൂക്ഷിച്ചു നോക്കിയിരുന്നോ.... .

ഏയ്...ഇല്ല അതെനിക്ക് വെറുതേ തോന്നിയതാവും...

"അപ്പോ ശരിക്കും ഹാക്കിംഗ് എന്നുപറഞ്ഞാലെന്തുവാ...?"

"ആക്ച്വലീ ഈ ഹാക്കിംഗ് എന്നുപറഞ്ഞാല്‍, കൊച്ചുപിള്ളേര്‍ക്ക് ട്രൗസറിട്ടുകൊടുക്കന്നപോലെ സിമ്പിള്‍ പണിയല്ല മിസ്റ്റര്‍ വാസൂ....

കുറച്ചൂടെ വ്യക്തമാക്കിയാല്‍....

പ്രോഗ്രാമുകളിലോ അല്ലെങ്കില്‍ ഉപകരണങ്ങളിലോ മാറ്റങ്ങള്‍ വരുത്തി, അത് ഉണ്ടാക്കിയവന്‍ ചിന്തിക്കാതിരുന്ന കാര്യങ്ങള്‍ക്ക് ഉപയോഗപ്പെടുത്തുന്ന പണിയാണ് ഹാക്കിംഗ് എന്നു പറയേണ്ടിവരും..വേര്‍ഡ്പ്രസ് ഹാക്ക്സ്, വെബ് ഡിസൈനിംഗുമായി ബന്ധമുള്ള സി.എസ്.എസ് ഹാക്ക്സ് എന്നിവ ഉദാഹരണമാണമായിപ്പറയാം"

"അപ്പോ എത്തിക്കല്‍ ഹാക്കിംഗിന്നു പറഞ്ഞാലോ....?"

"കമ്പ്യൂട്ടറുകളും നെറ്റ്‍വര്‍ക്കുകളുടെയും സുരക്ഷക്കുവേണ്ടിയുള്ള പെനട്രേഷന്‍ടെസ്റ്റിംഗാണത്. ഇത് ചെയ്യുന്നവരെ എത്തിക്കല്‍ ഹാക്കര്‍ അല്ലെങ്കില്‍ വൈറ്റ് ഹാറ്റ് ഹാക്കര്‍ എന്നു വിളിക്കും.

ഹാക്കിംഗ് ഉപയോഗിച്ച് നിയമവിരുദ്ധമായ കാര്യങ്ങളും ചെയ്യുന്നവരുണ്ട്.

സൈബര്‍ നിയമങ്ങളെ കാറ്റില്‍ പറത്തുന്നവരെ ബ്ലാക്ക് ഹാറ്റ് ഹാക്കര്‍ അഥവാ ക്രാക്കര്‍ എന്നാണ് വിളിക്കുന്നത്..."

ഇത് പറഞ്ഞുകൊണ്ടിരിക്കുമ്പോള്‍ തന്നെ സോമന്‍ഹാക്കറുടെ ഗ്ലാസ് രണ്ടുതവണ ഉയരുകേം താഴുകേം ചെയ്തു..

അരലിറ്റര്‍ റമ്മ് എവിടെപ്പോയന്ന് അറിഞ്ഞില്ല.. എനിക്കാണെങ്കി ആകെ കിട്ടിയത് രണ്ട് അറുപതും.. ബാക്കിയുള്ളത് ഈ ബ്ലാക്ക് ഹാറ്റ് ഹാക്കര്‍ പെനട്രേഷന്‍ ടെസ്റ്റിംഗ് നടത്തിത്തീര്‍ത്തു. ഇനി ബില്ല് പറഞ്ഞില്ലെങ്കില്‍ ന്‍റെ ട്രൗസറുകീറും...

ബില്ല് ടേബിളിലില്‍ കൊണ്ടുവച്ചപ്പോ ടോയ്‍ലറ്റില്‍ കേറിയ സോമന്‍ഹാക്കര്‍, ഞാന്‍ ബില്ലും സെറ്റിലു ചെയ്ത് ഒരു ബീഡിയും വലിച്ചു തീര്‍ന്നെട്ടേ മൂത്രമൊഴിച്ചു കഴിഞ്ഞിറങ്ങിയുള്ളു...

ഒടുവില്‍...

നാളെ ബാബുമേശിരീടെ കൂടെ വാര്‍ക്കപ്പണിക്കുപോകാനുള്ളതാണെന്നും പറഞ്ഞു ഒരു ഷേക്ക്ഹാന്‍റും തന്ന് ഹാക്കര്‍ ഇരുളിലേക്ക് പെനിട്രേറ്റുചെയ്തു.....

വാല്‍ക്കഷ്ണം

എന്തു വിദ്യകള്‍ ഉപയോഗിച്ചായാലും സൈബര്‍ക്രൈം ചെയ്താല്‍ അവസാനം ജാമ്യമെടുക്കാന്‍ ആളെ നോക്കേണ്ടിവരും എന്നാണ് ചരിത്രം നമ്മളെ പഠിപ്പിച്ചു തരുന്നത്...
അനോണിയായി പോക്രിത്തരം കാണിക്കാനായി പ്രോക്സി സര്‍വ്വറുകളേയും വെര്‍ച്ച്വല്‍ പ്രൈവറ്റ് നെറ്റ്‍വര്‍ക്കുകളേയും നമ്പാന്‍ കൊള്ളൂല്ല... ഉഡായിപ്പുവല്ലതും കാണിച്ചാ എപ്പോ ഇവന്‍മാര് നമ്മളെ ഒറ്റിക്കൊടുത്തൂന്ന് ചോദിച്ചാമതി...

പ്രോക്സി ബൈൻഡിംഗ് ടൂളുകള്‍ പോലെയുള്ളവ ഉപയോഗിച്ച് ചിലരൊക്കെ ഇപ്പോഴും നമുക്കുചുറ്റും സക്സസ്സ്ഫുള്‍ അനോണികളായിക്കളിക്കുന്നുണ്ട്.

കലിപ്പ് സൈബര്‍ നിയമങ്ങളാണ് ലോകത്തെല്ലായിടത്തും ഇന്ന് ഉള്ളത്.

ഇന്ത്യയിലെ സൈബര്‍ നിയമങ്ങളെക്കുറിച്ചറിയണമെങ്കില്‍ ഇവിടെ ഞെക്കാം.

ഫിഷിംഗ് ഒരു ഫ്ലാഷ്ബാക്ക് .....

പത്തുവര്‍ഷങ്ങള്‍ക്കുമുമ്പുള്ള കാര്യമാണ്... വാസുവല്ല അതിലെ നായകന്‍....(സത്യായും..)

ഹോസ്റ്റലിലെ എന്‍റെയൊരു സീനിയര്‍ ഫിഷിംഗിലു വളരെ തല്‍പരനായിരുന്നു..അവന്‍ എന്തു ചെയ്തെന്ന് വച്ചാല്‍ യാഹുവിന്‍റെ ഒരു ഫേക്ക് പേജ് അവന്‍റെയൊരു കൂതറ സൈറ്റില് ഹോസ്റ്റ് ചെയ്തു.. അതിനുശേഷം യാഹൂ ഗ്രീറ്റിംഗ്സ് കാര്‍ഡിന്‍റെ ലിങ്ക് പെമ്പിള്ളേര്‍ക്ക് അയച്ചുകൊടുക്കും.. ആ ലിങ്ക് യാഹുവിന്‍റെ ഫേക്ക് പേജില്‍...

കാര്‍ഡ് ഡിസ്പ്ലേ ചെയ്യാന്‍ വേണ്ടി യൂസര്‍നേമും പാസ്‍വേഡും എന്‍റര്‍ചെയ്യണമെന്ന ഇന്‍സ്ട്രക്ഷന്‍ തെളിയേണ്ട താമസം ഈ ഫ്രാഡ് പരിപാടികളെപ്പറ്റി അറിയാത്ത പാവംപെണ്‍കിടാങ്ങള്‍ അവരുടെ ചാരിതാര്‍ത്ഥ്യം അവന്‍റെ ലോഗറില്‍ അടിയറവെയ്ക്കും... ഫിഷിംഗ് സൈറ്റുകളെ പറ്റി ആളുകള്‍ക്ക് ഒരു ധാരണവന്നതോട് കൂടി അവന്‍ ഈ പണി നിര്‍ത്തിയെന്ന് പറഞ്ഞു കേള്‍ക്കുന്നു....

ഫേസ്ബുക്കില്‍ ആവശ്യമില്ലാത്ത ലിങ്കുകളിലൊക്കെ പിടിച്ചുഞെക്കി പാസ്‍വേഡു നാട്ടുകാര്‍ക്ക് കൊടുത്ത് പണിവാങ്ങുന്നവര്‍ക്ക് ഇപ്പോഴും ഒരു കുറവുമില്ല...

അവന്‍റെ പേര് ഈ പോസ്റ്റില്‍ ഉള്‍പ്പെടുത്തിയാല്‍ എന്‍റെ ബ്ലോഗ് ഇല്ലാതാക്കിക്കളയുമെന്നാണ് ഫീഷണി.....

ഡേയ് കുട്ടപ്പാ... നിന്‍റെ പേര് വാസുസാറ് പറഞ്ഞിട്ടില്ല കേട്ടാ...

എന്തായാലും ഇത്രേമായി എന്നാപ്പിന്നെ ഇതൂടെ ഇവിടെ വെറുതേകിടന്നോട്ടെ....

ആക്രാന്തം ഒഫ് ദ ഫര്‍ത്താവ്

2010-06-25T09:43:00.001+05:30

വാസു വിവാഹിതരുടെ ക്ലബില്‍ ചേര്‍ന്നത് രണ്ടായിരത്തി ഒമ്പത് ഡിസംബര്‍ പതിമൂന്നാം തീയതി ഉച്ചക്ക് കൃത്യം പന്ത്രണ്ട് നാല്‍പ്പത്തഞ്ചിനായിരുന്നു..

രാത്രിയായി..........

ആദ്യരാത്രി....

എ.റ്റി ജോയിയുടെ സിനിമയില് കാണുന്നപോലെയല്ല കാര്യങ്ങളെന്ന് മെല്ലെ മനസിലായി...

ഫാര്യാഫര്‍ത്താക്കന്‍മാരാകുമ്പോ പരസ്പരം ഒന്നും ഒളിക്കരുത് എന്നാണല്ലോ...

ഒരു ബ്രിഡ്ജിട്ടാ അങ്ങോട്ടും ഇങ്ങോട്ടും വേണ്ടേ...

പക്ഷേ... ലവള് ഞാന്‍ വിചാരിച്ചപോലല്ല...

അത് കാണിച്ചുതന്നില്ല....

ആദ്യരാത്രിയല്ലേ... ഞാന്‍ ക്ഷമിച്ചു....

പിറ്റേന്ന് എല്ലാം ശരിയാവും എന്ന് കരുതി...

ഇല്ല.... രക്ഷയില്ലാ......

മൂന്നാം നാള്‍ രാവിലെ.....എന്ത് സംഭവിച്ചാലും അത് കണ്ടിട്ടുതന്നെ കാര്യം എന്നങ്ങു തീരുമാനിച്ചു....

ഇപ്പോ അവള് കുളിക്കുകയാണ്...... ഷവറില്‍ നിന്ന് വെള്ളം വീഴുന്ന ശബ്ദം കേള്‍ക്കാം... എന്‍റെ ഹൃദയമിടിപ്പിന്‍റെ വേഗത കൂടിക്കൂടി വന്നു.....

ഞാന്‍ ശബ്ദമുണ്ടാക്കാതെ എഴുന്നേറ്റു

എന്നിട്ട് പതുക്കെ കുളിമുറിയെ ലക്ഷ്യമാക്കി നടന്നു...

കുളിമുറിയോട് ചേര്‍ന്നാണല്ലോ കമ്പ്യൂട്ടര്‍ ടേബിള്‍..

പെട്ടെന്നു തന്നെ പവര്‍ ബട്ടനില്‍ ഞെക്കി കമ്പ്യൂട്ടര്‍ ഓണ്‍ ചെയ്തു....

ഇത്രേം നാളായിട്ടും എനിക്ക് കാണിച്ചുതരാത്ത യാഹൂമെയിലിന്‍റെ ഇന്‍ബോക്സ് തുറന്നുകാണണം എന്ന ഒറ്റ ചിന്തമാത്രമേ അപ്പോ മനസില്‍ ഉണ്ടായിരുന്നുള്ളു...

യാഹൂസൈറ്റില്‍ കേറി അവളുടെ ഇമെയില്‍ ഐഡി അടിച്ചു...

ഇനി പാസ്‍വേഡ് അടിക്കണം...

എന്തായാലും പെണ്ണന്നല്ലേ പറയുന്നത്. ഏതെങ്കിലും കോമണ്‍ പാസ് വേഡായിരിക്കും ഉപയോഗിക്കുന്നത്.

ചുമ്മാ 123456, 1000, password തുടങ്ങിയ

ഹൈലി സെക്യുര്‍ പാസ്‌വേഡുകള്‍ ട്രൈ ചെയ്തു. ചിലപ്പോ തുറന്നാലോ...

അത്ഭുതം ഒന്നും സംഭവിച്ചില്ല....സ്ക്രീനില്‍ ഇങ്ങനെ തെളിഞ്ഞു

അട്ടയുടെ പീപ്പി വരെ കണ്ടിട്ടുള്ള വാസൂനോടാ കളി....

i cant access my account എന്ന സാധനത്തില്‍ പിടിച്ചു ഞെക്കി. ദാ വന്നു പുതിയൊരു പേജ്

എന്തും വരട്ടെ... ആദ്യം കാണുന്നത് തന്നെ സെലക്ടു ചെയ്തേക്കാം....

എന്നാപ്പിന്നെ യാഹു ഐഡിയും ടൈപ്പാം

Alternate email id യോ...സോറി ഞാന്‍ അത്തരക്കാരനല്ല...എന്നാപ്പിന്നെ അവളുടെ സെക്യരിറ്റി ക്വസ്റ്റ്യന്‍സും കൂടി നോക്കിയിട്ട് പരിപാടി അവസാനിപ്പിക്കാമെന്നു വിചാരിച്ചു ലോ ലത് സെലകട് ചെയ്തു

അത് ശരി...സംഭവം സിംപിള്‍ ക്വസ്റ്റ്യനാണല്ലോ...

ഇതിന്‍റെ ആന്‍സര്‍ അറിയാന്‍ എനിക്ക് വിക്കിപീഡിയല് പോയിനോക്കേണ്ട കാര്യമില്ല....അതടിച്ചുകൊടുത്തിട്ട് നെക്സ്റ്റില് ഞെക്കി...

ശ്ശൊ.... പിന്നേം അടുത്ത ചോദ്യം.

ഇത് മനുഷ്യനെ കുടുക്കുന്ന ചോദ്യ തന്നെ..

ബാലരമ...പൂമ്പാറ്റ... കളിക്കുടുക്ക.. നാന... ചിത്രഭൂമി... ഇതിലേതായിരിക്കും....ഉത്തരം...??

ഡിസ്ക് എടുക്കാന്‍...സോറി റിസ്ക് എടുക്കാന്‍ നിന്നില്ല... നേരെ അവളുടെ ഓര്‍ക്കൂട്ട് പ്രൊവൈലില്‍ കേറി നോക്കി....

ന്‍റമ്മേ... ഹാരി പോട്ടറോ...!! ലിതെക്കെ ചുമ്മാ വെയിറ്റിന് അടിച്ചിട്ടിരിക്കുവാരിക്കും... എന്തായാലും ഒന്ന് ട്രൈ ചെയ്തു നോക്കിയെക്കാം...

ഫാഗ്യം ലത് ആക്സപ്റ്റ് ചെയ്തിരിക്കുന്നു...

അങ്ങനെ അവിടുന്നും Next അടിച്ച് തോന്നിവാസത്തിന്‍റെ അടുത്ത സ്റ്റെപ്പിലേക്ക് കടന്നു

വെറുതെ കുറെ Next buttons ഞെക്കി

അങ്ങനെ ഒടുവില്‍ വാസു വിജയിച്ചു..ഇന്‍ബോക്സ് തുറന്നുകണ്ടു..

എങ്കിലും....

അവളുടെ ഇന്‍ബോക്സില്‍ നിന്നും ട്രാഷില്‍ നിന്നും യാഹുവിന്‍റെ സര്‍വീസ് മെസ്സേജ് നീക്കം ചെയ്തിട്ടേ ഞാന്‍ അടങ്ങിയുള്ളു.

എന്തായാലും ഇതേ മാര്‍ഗ്ഗത്തില്‍ അവള്‍ വീണ്ടും ഈ അക്കൗണ്ട് ആക്സസ് ചെയ്യും. വെറുതേ എന്തിനാ നമ്മളായിട്ട് ഉണ്ടാക്കിയ ഒരു മെസ്സേജ് അന്യരുടെ മെയില്‍ ബോക്സിലിടുന്നത്...അത് മോശമല്ലേ...

ഇനി അതിലെ സ്പാം മെസജൊക്കെ ഡിലീറ്റിക്കളയണം..

അല്ലെങ്കില്‍ ഫര്‍ത്താവെന്ന് പറഞ്ഞ് നെഞ്ചും വിരിച്ച്(?) നടന്നിട്ടെന്തു കാര്യം...ല്ലേ...

ഇവിടെ വാസൂ, വാസുവിന്‍റെ വൈഫിയുടെ പാസ്‍വേഡ് ആണ് ബ്രേക്ക് ചെയ്തിരിക്കുന്നത്...മറ്റുപലതും ബ്രേക്ക് ചെയ്തട്ടും ഉണ്ടാകും...അത് വാസൂന്‍റെ കുടുംബകാര്യം..

ഇമെയില്‍ പാസ്‍വേഡ് ബ്രേക്ക്ചെയ്യാന്‍ സഹായിക്കുന്ന ലളിതമായ മാര്‍ഗ്ഗങ്ങളും സങ്കീര്‍ണ്ണമായ മാര്‍ഗ്ഗങ്ങളുമൊക്കെ വെറുതേ സെര്‍ച്ച് ചെയ്താല്‍ ഏത് പട്ടിക്കുഞ്ഞിനുപോലും കിട്ടും...

ബട്ട്......

"ആരാന്‍റെ പാസ്‍വേഡ് എടുത്ത് കളിക്കുന്നവര്‍,

ഐ.ടി ആക്ട് സെക്ഷന്‍ 66C പ്രകാരം റെഡി കാഷായി ഒരു ലക്ഷം രൂപ കരുതിക്കോണം. ഭാഗ്യമുണ്ടെങ്കി കമ്പിയുമെണ്ണാം.."

അങ്ങനൊക്കെ ചെയ്യുന്നവര്‍ ചെമലക്കളറില്‍ എഴുതി വച്ചിരിക്കുന്നത് ഓര്‍ക്കുന്നത് നന്നായിരിക്കും....

ആക്ച്വലീ ഈ പോസ്റ്റ്കൊണ്ട് ഞാനുദ്ദേശിക്കുന്നത്.......

ഇമെയിലുമായി ബന്ധപ്പെട്ട് സാധാരണ സംഭവിക്കുന്ന ഒരു സുരക്ഷാപാളിച്ചയാണ് മുകളില്‍ ചൂണ്ടിക്കാണിച്ചിരിക്കുന്നത്

സൈബര്‍ ലോകത്ത് എപ്പോഴും സുരക്ഷിതരായിരിക്കുക എന്നത് ഒരു വിശ്വാസം മാത്രമാണ്. എപ്പോ വേണമെങ്കിലും നമ്മളുടെ വിവരങ്ങള്‍ മറ്റുവള്ളവരിലേക്ക് എത്താം..അതുപയോഗിച്ച് നമ്മളെ ഭീഷണിപ്പെടുത്താം, നാറ്റിക്കാം, ധന നഷ്ടങ്ങളും ഉണ്ടാക്കാം

ഇമെയിലുകളെ ഒരു പരിധി വരെയെങ്കിലും സുരക്ഷിതമാക്കാന്‍ താഴെപ്പറയുന്നവ സഹായിച്ചേക്കും.....

ഒന്ന്: സെക്യൂരിറ്റി ക്വസ്റ്റ്യന്‍സ് ഉണ്ടാക്കുമ്പോ അതിന്‍റെ ഉത്തരങ്ങള്‍ മറ്റുള്ളവര്‍ക്ക് കണ്ടുപിടിക്കാന്‍ പറ്റാത്തത് ആണെന്ന് ഉറപ്പ് വരുത്തുക

രണ്ട്: വളരെ സെന്‍സിറ്റീവ് ആയ വിവരങ്ങള്‍, ചിത്രങ്ങള്‍, വീഡിയോകള്‍ തുടങ്ങിയവ എല്ലാവര്‍ക്കും അറിയാവുന്ന ഇമെയിലുകളില്‍ (orkut/yahoo messenger/facebook/other social networks) സൂക്ഷിക്കാതിരിക്കുക

വാല്‍ക്കഷ്ണം:

ഇത്തരം കൂതറ രീതിയില്‍ അന്യരുടെ ഇമെയില്‍ കുത്തിത്തുറക്കുന്നതിനെ ഹാക്കിംഗ് എന്നു വിളിച്ചാല്‍ ഒറിജനല്‍ ഹാക്കര്‍മാര്‍ എന്നെ ഇഷ്ടികക്ക് എറിഞ്ഞിടും...ഇത്തരം കഞ്ഞി സെറ്റപ്പിന് സ്ക്രിപ്റ്റ് കിഡ്ഡി എന്നാണ് വിളിക്കുന്നത്...വിളിക്കേണ്ടത്...

ഇങ്ങനെയൊക്കെയുള്ള കച്ചടപ്പരിപാടികള്‍ ചെയ്യുന്നവര്‍ക്കും, താല്‍പര്യമുള്ളവര്‍ക്കും പ്രയോജനം ലഭിക്കാവുന്ന ഒരു പോസ്റ്റുണ്ട്...

അതിലേക്ക് പോണമെങ്കില്‍ ദിവിടെ ഞെക്കുക

കള്ളുകുടിയന്‍മാര്‍ അറിയാതെ പോകുന്നത്....

2010-06-21T21:16:00.002+05:30

വാസുവൊരു ബ്ലോഗറായ കാര്യവും, സൈബര്‍ജാലകത്തില്‍ വാസൂന്‍റെ ഒരു പോസ്റ്റ് വന്നകാര്യവുമൊക്കെ ബി.ബി.സിയില്‍ സ്ക്രോള്‍ ന്യൂസ് വന്നതുകൊണ്ട് കൂട്ടുകാരൊക്കെ അറിഞ്ഞു..

അതിന്‍റെ ചെലവ് ചെയ്യണമെന്ന് പറഞ്ഞ് അരിഷ്ടക്കട നടത്തുന്ന ശശി ദിവസം ഒരമ്പതുപ്രാവശ്യം മിസ്ഡ് കോളടിക്കും...കള്ളുകുടിക്കാനോരോ കാരണങ്ങള്‍..

ശല്യം സഹിക്കാണ്ടായപ്പോ ന്നാപ്പിന്നെ ഇന്ന് വൈകിട്ടുതന്നെ ആ കര്‍മ്മം അങ്ങട് നടത്താമെന്ന് വിചാരിച്ചു...

ഒരു ഓ.സി.ആര്‍ ഫുള്ളുവാങ്ങിക്കൊണ്ടുവരാന്‍ കൈക്കാരന്‍ പയ്യനെവിട്ടു....ആറുമണിക്ക് ക്യൂവില്‍ക്കയറി നിന്നാലേ ഒരു എട്ടുമണിക്കെങ്കിലും സാധനം കയ്യിലുകിട്ടൂ...

ഐഡിയ.......ഈ ഗ്യാപ്പില്‍ ശശിക്ക് കുറച്ച് ചെമസ്ട്രി പറഞ്ഞുകൊടുക്കാം...

അവന്‍റെ ശാസ്ത്രാഭിരുചി(സ്പെല്ലിംഗ് ശരിയാണോ എന്തോ) പരീക്ഷിക്കാന്‍ ഒരു കുഞ്ഞുചോദ്യം ചൂണ്ടയില്‍ കൊരുത്തെറിഞ്ഞു...

"ഡേ.. ശശി.... നീയിപ്പോ ഒരു അറുപത് ഓ.സി.ആറും അറുപത് വെള്ളവും ഒരു ഗ്ലാസില്‍ ഒഴിച്ചു-അപ്പോ ആ ഗ്ലാസില്‍ ടോട്ടല് ഇപ്പം എത്രേം ഉണ്ടാകും?"

"... നീ കള്ളു വാങ്ങിച്ച് തരുമെന്ന് വിചാരിച്ച്... ഒരുമാതിരി ഓക്ലേശിക്കുന്ന വര്‍ത്താനം പറഞ്ഞാലുണ്ടല്ലോ...".

"ശ്ശെ.. ഞാന്‍ സീരിസായി ചോദിച്ചതാ...എത്രകാണും..ആലോയിച്ചു നോക്കിയാണ്.?"

".....നൂറ്റിഇരുപത്......"(കുറച്ച് ആലോചിച്ചെങ്കിലും ഉത്തരം വന്നു)

"ഹാ...ഹാ... .. ഇത് നീ പറയുമെന്ന് എനിക്കറിയാരുന്നു..അതാ ചോദിച്ചത്...."

"എടാ മണുഗുണാ‍‍‍‍ഞ്ചാ..... എന്നാപ്പിന്നെ എത്ര കാണുമെന്ന് നീ പറഞ്ഞ് ഒലത്ത്.."

"നീ ചൂടാവണ്ട.....ചെമസ്ട്രിപരമായി ഒലത്താന്‍ പറഞ്ഞാല്‍ ആ ഗ്ലാസില്‍ നൂറ്റി ഇരുപത് ഒരിക്കലും ഒണ്ടാവില്ല........"

"ങ്ങേ...അതെന്ത് ഓ.സി.ആറ് ആവിയായിപ്പോണ്ടാണോ..?"
ശശിയുടെ ബ്രെയിന്‍ പ്രവര്‍ത്തിച്ചു തുടങ്ങി

"അല്ലടേ...അത് ഈ ആല്‍ക്കഹോള്‍-വെള്ളം മിശ്രിതത്തിന്‍റെ ഒരു പ്രത്യേകത കൊണ്ടാണ്....."

"യെന്നുവച്ചാലെന്താന്നു തെളിച്ചു പറയടേ...."

"പറയാം... പറയാം....വെള്ളം-ആല്‍ക്കഹോള്‍ മിശ്രിതത്തിന്‍റെ വ്യാപ്തം നമ്മള്‍ പ്രതീക്ഷിക്കുന്നതിനേക്കാള്‍ കുറയുന്നതിന് എന്തുകൊണ്ടാണെന്നുവച്ചാല്‍....

വെള്ളത്തിന്‍റെ തന്മാത്രകള്‍ തമ്മില്‍ ചെറിയ ഗ്യാപുകള്‍ ഉണ്ട്. ഈ ഗ്യാപുകളില്‍ കുറച്ച് ആല്‍ക്കഹോള്‍ തന്മാത്രകള്‍ക്ക് സ്ഥിതിചെയ്യാന്‍ കഴിയും.
അതിനാല്‍ മിശ്രിതത്തിന്‍റെ വ്യാപ്തം പ്രതീക്ഷിക്കുന്നതിനേക്കാള്‍ കുറവായിരിക്കും"

"തന്മാത്രയും..വ്യാപ്തവും... നീ സംഭവം സിംപിളാക്കി പറ...."

"ഓക്കെ....അങ്ങനെങ്കില്‍ അങ്ങനെ....ഒരു ഗ്ലാസില്‍ പകുതി ഭാഗത്ത് ഗോലികളും മറ്റൊരു ഗ്ലാസില്‍ പകുതിഭാഗം മണലും എടുക്കുക. ഇത് പരസ്പരം കൂട്ടിച്ചേര്‍ത്താല്‍ ഗോലി-മണല്‍ മിശ്രിതം ഒരു ഫുള്‍ ഗ്ലാസില്‍ കുറവായിരിക്കും. ന്തായിരിക്കും കാര്യം?"

"ഗോലികള്‍ക്കിടയിലുള്ള ഗ്യാപ്പില്‍ മണല്‍ കേറുന്നതുകൊണ്ടല്ലേ?"

"യെസ്.. ദേര്‍ യൂ ആര്‍...ഇപ്പ കാര്യം മനസിലായില്ലേ....."

"മനസിലായി...മനസിലായി....... ദാണ്ടെ ചെറുക്കന്‍ ഫുള്ളുമായിട്ട് വന്നു...
ഒരു അറുപത് ഓ.സി.ആറും അറുപത് വെള്ളവും ഞാനിപ്പോ മിക്സാന്‍ പോവ്വാ... മിക്സുമ്പോ അത് നൂറ്റിഇരുപത് തന്നെവന്നാ നിന്‍റെ ചെവിക്കല്ല് ഞാന്‍ അടിച്ചു പറിക്കും......."

ഈസ്വരാ ഫവ്വാനേ..... അളവ് കൃത്യമായി കണ്ടുപിടിക്കാന്‍ വേണ്ടി അരിഷ്ടം അളക്കുന്ന ഗ്ലാസ്സെടുക്കാന്‍ ശശി അകത്തോട്ടു പോയിരിക്കുവാ....
ന്‍റെ ചെമസ്ട്രിപരമ്പര ദൈവങ്ങളേ... എന്‍റെ ചെവിക്കല്ല് നീ കാത്തോളണേ...

സാങ്കേതിക തടസ്സങ്ങള്‍ മാറാന്‍ ദിത് കൂടി വായിച്ചോളൂ....

തന്മാത്രാ...തന്മാത്രാ എന്നു പറഞ്ഞാല്‍ മോഹലാലിന്‍റെ സിനിമയല്ല ഉദ്ദേശിച്ചത്... ദത് ഒരു പദാര്‍ത്ഥത്തിന്‍റെ എല്ലാ ഗുണങ്ങളും കാണിക്കുന്ന ഏറ്റവും ചെറിയ കണികയാണ്. മോളിക്യൂള്‍(molecule) എന്നും ഇംഗ്ലീഷുമീഡിയത്തില്‍ പഠിച്ച അഹങ്കാരികള്‍ ഇതിനെ വിളിക്കാറുണ്ട്

വ്യാപ്തം എന്നാല്‍ ഒരു വസ്തുവിന് സ്ഥിതിചെയ്യാന്‍ ആവശ്യമായ സ്ഥലമാണ്

ആല്‍ക്കഹോള്‍ എന്നത് ഓര്‍ഗാനിക സംയുക്തങ്ങളിലെ ഒരു വിഭാഗമാണ്. ആയിരക്കണക്കിന് വ്യത്യസ്തമായ ആല്‍ക്കഹോള്‍ സംയുക്തങ്ങളുണ്ട്.
അതില്‍ത്തന്നെ കുടിച്ചാല്‍ കണ്ണുപോകാത്തതും, മാദക ഗന്ധമുള്ളതും, ബ്‍വ്റജ്സില്‍ കിട്ടുന്നതും എഥനോള്‍ എന്ന ആല്‍ക്കഹോള്‍ മാത്രമാണ്....എഥനോളിന്‍റെ ഇരട്ടപ്പേരാണ് ഈതൈല്‍ ആല്‍ക്കഹോള്‍ കേട്ടോ....

അപ്പോ ഇനി ചിയേഴ്സ്.......

ഡി.എന്‍.എസ്സ് സെര്‍വ്വറിനൊരു ചുറ്റുവിളക്ക്

2010-06-19T13:12:00.000+05:30

ഡും...ഡും...ഡുംഡും...ഡൂംഡൂംഡൂം....

ആ കൂതറ ശബ്ദം കേട്ടാണ് ഇന്ന് രാവിലെ കണ്ണുവിരിഞ്ഞുണര്‍ന്നത്...

സൂര്യനുദിച്ചിട്ട് വെറും നാലുമണിക്കൂറേ ആയുള്ളു ഏതു കോപ്പനാ ഈ അതിരാവിലെ മനുഷ്യനെ ശല്യപ്പെടുത്താന്‍...

നല്ലൊരു തെറി പെട്ടെന്നു വിളിക്കാന്‍ പാകത്തിന് മെമ്മറിയില്‍ ലോഡ് ചെയ്ത് കതകു തുറന്നു...

ങേ...തങ്കപ്പനാശാന്‍...ന്‍റെ കമ്പ്യൂട്ടര്‍ ഗുരു...

"എന്താ ആശാനേ രാവിലെ?"

"ഡേയ് നീയെനിക്കൊരു അമ്പതു രൂപാ താ...ഒരു അര്‍ച്ചന നടത്താനുണ്ട്".

ആശാന്‍റെ ഫാഷയില്‍ അര്‍ച്ചനയെന്ന് പറഞ്ഞാല്‍ ക്വാട്ടറാണ്......

എന്തായാലും ആ പരമ ഭക്തന് ചുറ്റുവിളക്കൊന്നും നടത്താന്‍ തോന്നാതിരിക്കാന്‍ പ്രാര്‍ത്ഥിച്ചുകൊണ്ട് കാശെടുത്തുകൊടുത്തു.

എന്തായാലും കാശുപോയി എന്നാപ്പിന്നെ എങ്ങനെങ്കിലും അതു മുതലാക്കണമെന്ന് വിചാരിച്ച് ഒരു ചോദ്യമങ്ങ് എറിഞ്ഞു...

"DNS സെര്‍വ്വര്‍ മാറ്റിക്കൊടുത്താ എങ്ങനാ ബ്രൗസിംഗ് സ്പീഡ് കൂടുന്നേ?"

"എടാ മണ്ടാ അത് നിനക്കറിഞ്ഞൂടേ...അതായത് ഈ DNS സെര്‍വ്വര്‍ എന്ന് പറഞ്ഞാ സിംപളായി....

നീ ഇപ്പോ www.google.com എന്ന് അടിച്ചുകൊടുക്കുന്നു എന്നു വിചാരിക്കുക അതിനെ ഇവന്‍ 66.102.7.104 പോലെ ഒരു ഐ.പി അഡ്രസായി മാറ്റുന്നു. ഈ പ്രക്രിയ എത്ര വേഗത്തില്‍ നടക്കുമോ അത്രേം വേഗത്തില്‍ നിനക്ക് ഇന്‍റര്‍നെറ്റ് ബ്രൗസ് ചെയ്യാനും സാധിക്കും."

"..പക്ഷേ ഇപ്പോഴും ആ പ്രതിക്രിയയൊക്കെ നടക്കുന്നുണ്ടല്ലോ.."

"പ്രതിക്രിയയല്ലടാ പ്രക്രിയ..പ്രക്രിയ..
അത്..ഇപ്പോഴും നടക്കുന്നുണ്ട്.. പക്ഷേ ഇപ്പോ നീ ഉപയോഗിക്കുന്നത് നിന്‍റെ സര്‍വ്വീസ് പ്രൊവൈഡറിന്‍റെ DNS സെര്‍വ്വറാണ്.. മിക്കവാറും അത് മെല്ലെയായിരിക്കും പ്രവര്‍ത്തിക്കുന്നത്"

"അപ്പോ ഇതെങ്ങനെ മാറ്റും...വേറെ എന്താ മാര്‍ഗ്ഗം..???"

"വേറെ ഒരുപാട് DNS സെര്‍വ്വറുകളൊക്കെയുണ്ട്. പക്ഷേ അതില്‍ ഏതിനാണ് സ്പീഡെന്ന് മനസിലാക്കണം.

അത് മനസിലാക്കാന്‍ ഉള്ള ഒരു ഫ്രീ ടൂളാണ് NameBench നീ അതിന്‍റെ ലിങ്കില്‍ ക്ലിക്കി ഡൗണ്‍ലോഡുചെയ്ത് ഇന്‍സ്റ്റാള്"

"ചെയ്തു...അപ്പോ ദിങ്ങനെ വരുന്നു ആശാനേ..."

"... നീ അതിനെയെടുത്ത് ബെഞ്ച്മാര്‍ക്ക് ടെസ്റ്റുകൊടുക്ക്...ഇതിനു കുറച്ചു സമയം പിടിക്കും....."

"ആശാനേ.....ദാ ഇപ്പം ഒരു റിപ്പോര്‍ട്ട് ജനറേറ്റ് ചെയ്തു..."

"...ആ റിപ്പോര്‍ട്ടില്‍ റെക്കമന്‍റഡ് കോണ്‍ഫിഗറേഷന്‍ കാണും

അതെടുത്ത് DNS കോണ്‍ഫിഗറേഷനില്‍ പൂശ്"

"അതെങ്ങനാ ആശാന?"

"ഡേ നീ ഡെസ്ക്റ്റോപ്പിലുള്ള My Network Places ഐക്കണില്‍ റൈറ്റ് ക്ലിക്കു ചെയ്ത് അത്ന്‍റെ Properties എടുക്ക്

എന്നിട്ട് Local Area Connection ല്‍ ക്ലിക്ക്

അതിന്‍റേം Properties ല്‍ ക്ലിക്ക്

ഇനി Internet Protocol version4 (TCP/IPv4) സിലക്ട് ചെയ്ത് അതിനെ ഡബിള്‍ ക്ലിക്ക് ചെയ്യ് അല്ലെങ്കില്‍ അതിന്‍റേം Properties ല്‍ ക്ലിക്കു ചെയ്യ്

use following DNS server addresses എന്നതില്‍ ക്ലിക്ക് ചെയ്ത് നേരത്തേ ജനറേറ്റ് ചെയ്ത റെക്കമെന്‍റഡ് കോണ്‍ഫിഗറേഷന്‍ ഇവിടെ അടിച്ചിടുക

അല്ലെങ്കില്‍ ഇതിന്‍റെ Advanced ടാബില്‍ ക്ലിക്കി താഴെക്കാണുന്നതുപോലെ മൂന്നു സെര്‍വ്വറുകളും കോണ്‍ഫിഗര്‍ ചെയ്യാം

.... ഇനി സിസ്റ്റം റീ സ്റ്റാര്‍ട്ട് ചെയ്തു നോക്ക്"

തള്ളേ...കൊള്ളാം... ഇപ്പം ഇദ് പൊളപ്പനായി പേജൊക്കെ ലോഡു ചെയ്യുന്നുണ്ട്.... ഡാങ്ക്യൂ ആശാനേ ഡാങ്ക്യൂ....

പക്ഷേ നന്ദിപറയാന്‍ നോക്കിയപ്പോ ആശാനെ കണ്ടില്ല...
ചതിച്ചോ കാവിലമ്മേ......
ഞാന്‍ ഓടി.....
.
.
.

ഓടിച്ചെന്ന് .....

പേഴ്സ് തുറന്നുനോക്കി...... ഒരു ചുറ്റുവിളക്കിനുള്ള കാശ് അതില്‍ നിന്നും അപ്രത്യമായിരിക്കുന്നു..!!

വാല്‍ക്കഷ്ണം

ISP provider ന്‍റെ പഴയ സെറ്റിംഗ്സിലേക്ക് തിരിച്ചു പോകണമെങ്കില്‍

obtain DNS server address automatically എന്നതില്‍ ക്ലിക്കിയാല്‍ മതി

NameBench.ഒരു ഓപ്പണ്‍സോഴ്സ് ബെഞ്ച്മാര്‍ക്ക് യൂട്ടിലിറ്റിയാണ് കൂടുതലറിയണമെങ്കില്‍ ഇവിടെ ഞെക്കാം